តាកែវ — ពលរដ្ឋរស់នៅភូមិនៅភូមិអង្គក្រសាំង នៃឃុំព្រៃល្វា ស្រុកព្រៃកប្បាស បានសម្តែងនូវការហួសចិត្ត ចំពោះមន្រ្តីសាលាស្រុកព្រៃកប្បាសចំនួន២រូប គឺលោក កង វន្ថា អភិបាលរងស្រុកព្រៃកប្បាស និងលោក ឆុង ផូ ប្រធានភូមិបាលស្រុកព្រៃកប្បាស នៅពេលចុះដោះស្រាយទំនាស់ដីធ្លីដ៏រ៉ាំរ៉ៃមួយ កាលពីថ្ងៃទី៦ សីហា កន្លងទៅនេះ ដោយធ្វើការសម្លុតទៅលើភាគីទំនាស់ម្ខាងទៀតមិនមែនជាបក្ខពួកខ្លួនទោះមានឯកសារស្របច្បាប់ក៏ដោយ ហើយឲ្យធ្វើតាមខ្លួនដែលលម្អៀងទៅរកភាគីម្ខាងទៀត។
(ឆ្វេងមកស្តាំ) លោក ឆុង ផូ ប្រធានភូមិបាលស្រុកព្រៃកប្បាស និងលោក កង វន្ថា អភិបាលរងស្រុកព្រៃកប្បាស
បើតាមពលរដ្ឋថា នៅពេលកំពុងដោះស្រាយទំនាស់នោះ លោក ឆុង ផូ និងលោក កង វន្ថា ដែលគ្រាន់តែមានតួនាទីជាអ្នកសម្របសម្រួលបានប្រើពាក្យអសុរោះ និងបង្ខំឲ្យភាគីម្ខាងដែលមានឯកសារគ្រប់គ្រាន់ទទួលយកតាមសំណូមពររបស់ខ្លួន និងបានលើកឡើងថា រាល់ឯកសារដែរមានសុទ្ធតែក្លែងក្លាយ ហើយនៅពេលគេមិនព្រមទទួលយកតាមការចង់បានរបស់ខ្លួន មន្រ្តីទាំងពីររូបនោះបែរជាមកចាប់យកទូរស័ព្ទ ហើយគម្រាមចាប់ដាក់គុគទៀត។
ប្រជាពលរដ្ឋដែលបានឃើញហេតុការណ៍នោះនិយាយថា សកម្មភាពរបស់មន្រ្តីទាំង២រូបនេះ បានបង្ហាញពីការកង្វះសមត្ថភាព និងគ្មានក្រមសីលធម៌ជាមន្រ្តីបម្រើរាស្រ្ត ស៊ីប្រាក់ខែរដ្ឋនោះឡើយ ដូច្នេះគេរំពឹថា ថ្នាក់លើនឹងមានវិធានការតាមផ្លូវរដ្ឋបាលចំពោះមន្រ្តីដែរមិនបម្រើរាស្រ្តទាំង២នាក់ផង។
ពាក់ពន្ធ័ករណីខាងលើនេះ លោក ញ៉ែម ស្រស់ អភិបាលស្រុកព្រៃកប្បាសបានថ្លែងថា លោកបានចាត់តាំងមន្រ្តី២រូបខាងលើចុះទៅរកដំណោះស្រាយជូនពលរដ្ឋដែលមានទំនាស់គ្នារឿងដីធ្លី តែលោកមិនឲ្យទៅប្រើកាយវិការមិនសមរម្យដាក់រាស្រ្តនោះទេ ម្យ៉ាងទៀតបើសិនជាមន្រ្តី២រូបនេះប្រើពាក្យគម្រាម ឬប្រមាថមែន សូមពលរដ្ឋដាក់ពាក្យប្តឹងពីបទព្រណ្មទណ្ឌតែម្ដងទៅ ព្រោះពេលខ្លះមន្ត្រីរបស់លោកកែមិនឡើងទេ៕
