ក្រុមអាជីវករផ្សារតាកែវប្រមាណជាង១០នាក់កាលពីថ្ងៃម្សិលមិញ បានសម្រុកលើកគ្នាចូលមកដល់សាលាខេត្តតាកែវតែម្តង ដើម្បីសុំអន្តរាគមន៍ផ្ទាល់ពីលោក អ៊ូច ភា អភិបាលខេត្តតាកែវ ពាក់ព័ន្ធនឹងករណីរុះរើផ្សារតាកែវធ្វើថ្មី រួចលក់តូបម្តងទៀតឲ្យអាជីវករ។
ក្នុងជំនួបឈរទល់មុខជាមួយលោក អ៊ូច ភា អភិបាលខេត្តតាកែវ ក្រុមអាជីវករបានស្នើឲ្យលោកអភិបាលខេត្តចេញលិខិតលុបចោលការសាងសង់ផ្សារនេះ ដោយថា ពួកគាត់គ្មានលទ្ធភាពនឹងរកប្រាក់មកបង់ទិញតូបម្តងទៀតនោះទេ ខណៈសេដ្ឋកិច្ចកំពុងតែដុនដាបដោយសារវិបត្តិជំងឺកូវីដ១៩នោះ។ ក្រុមអាជីវករខ្លះបានលើកឡើងទៀតថា គាត់បានរកស៊ីលក់ដូរនៅផ្សារនេះគ្រាន់បានប្រាក់ចិញ្ចឹមគ្រួសារ ហើយបច្ចុប្បន្ននេះកំពុងមានវិបត្តិកូវីដ១៩ ដោយរកស៊ីមិនសូវបានផង ស្រាប់តែមកមានការរុះរើធ្វើផ្សារថ្មី ហើយតម្រូវឲ្យពួកគាត់ទិញតូបម្តងទៀត ពួកគាត់មិនដឹងថា តើនឹងទៅរកលុយឯណាមកទិញនោះទេ។
ជាការឆ្លើយតបទៅនឹងការលើកឡើងរបស់ក្រុមអាជីវករ លោក អ៊ូច ភា អភិបាលខេត្តតាកែវ បានថ្លែងថា លោកមិនដែលចេញលិខិតអនុញ្ញាតឲ្យមានការរុះរើ និងសាងសង់ផ្សារតាកែវថ្មីនោះទេ ដូច្នេះធ្វើម្តេចលោកអាចចេញលិខិតលុបចោលការសាងសង់នោះ ។ លោកថា ទាល់តែមានការសិក្សា និងស្រង់មតិយោបល់ពីបងប្អូនអាជីវករជាមុនសិន ទើបការសាងសង់អាចធ្វើទៅបាន ។
បើតាមក្រុមអាជីវករថា កន្លងមកមានការបំផុសបំផុល និងមានមនុស្សដើរលក់តូបផ្សារ ដោយថាផ្សារតាកែវ នឹងត្រូវធ្វើការរុះរើ រួចសង់ថ្មីដោយឈ្មួញឈ្មោះ ឡោ ជំនិត ដោយគេដឹងថា ឈ្មួញរូបនេះបានវិនិយោគសង់ផ្សាររដ្ឋជាច្រើនមកហើយនៅក្នុងខេត្តតាកែវ ក្នុងនោះមានដូចជាផ្សារណាត់ជាដើម ក្រោមរូបភាពធ្វើនំអត់ម្សៅ។
វិនិយោគ ដោយការធ្វើនំអត់ម្សៅ តើគេធ្វើរបៀបម៉េច?
បើតាមដឹងរឿងរ៉ាវខ្លះនិយាយថា ការធ្វើនំអត់ម្សៅនេះ គឺឈ្មួញគេគូរគម្រោងសាងសង់ផ្សារដោយពុះជាតូបៗ ហើយដើរលក់តូបនោះឲ្យអាជីវក ឬអ្នកដែលមានលទ្ធភាពទិញក្នុងតម្លៃមួយតូបរាប់ម៉ឺនដុល្លារ រួចទើបប្រមូលលុយទាំងនោះមកចែកគ្នា និងធ្វើការសាងសង់តាមក្រោយ ដូចជាករណីផ្សារណាត់ ឈ្នួញអាចប្រមូលលុយពីការពុះតូបលក់បានរហូតដល់ទៅរាប់លានដុល្លារ។
យ៉ាងណាក៏ដោយ នៅថ្ងៃនេះ យើងមិនទាន់អាចស្វែងរកការបំភ្លឺពីលោក ឡោ ជំនិត ដែលជាឈ្មួញរកស៊ីធ្វើការវិនិយោគផ្សារនៅក្នុងភូមិសាស្រ្តខេត្តតាកែវបាននៅឡើយទេ៕
