តាកែវ – ក្រោយពីមានការសម្តែងមតិសោកស្តាយរបស់មន្រ្តីរាជការ ក៏ដូចជាប្រជាពលរដ្ឋ ចំពោះការលួចឃុបឃិតគ្នាកាប់ដើមគីនីន២ដើមដែលមានអាយុជិត១រយឆ្នាំ ស្ថិតនៅក្នុងបរិវេណសាលាវត្តកោះ ស្ថិតក្នុងឃុំបាស្រែ រួចមក លោក ឌឹម គឹមសាន្ត អភិបាលស្រុកអង្គរបូរីបានថ្លែងថា លោកនឹងធ្វើការស៊ើបអង្កេតរកអ្នកលួចអនុញ្ញាតឲ្យមានការកាប់ដើមឈើនេះ។
លោក ឌឹម កឹមសាន្ត អភិបាលស្រុកអង្គរបូរី និងដើមគីនីនដែលគេលួចកាប់
លោក ឌឹម គឹមសាន្ត បានថ្លែងថា ក្រោយពីទទួលដំណឹងពីការកាប់ដើមគីនីនដែលមានអាយុជិត១រយឆ្នាំ នៅក្នុងបរិវេណសាលាវត្តកោះ ស្ថិតក្នុងឃុំបាស្រែ រួចមក លោកបានបញ្ជាឲ្យអាជ្ញាធរចុះទៅហាមឃាត់ និងបញ្ឈប់មិនឲ្យមានការកាប់បន្តទៀតទេ ខណៈដែលក្រុមអ្នកកាប់បានកាប់មែកលះរួចហើយ ហើយថា លោកនឹងបើកការស៊ើបអង្កេតរកឲ្យឃើញអ្នកដែលអនុញ្ញាតឲ្យមានការកាប់នេះ។
បើតាមប្រភពខ្លះថា ដើមគីនីនដែលមានអាយុកាលជិត១រយឆ្នាំនេះ គេបានឃើញឈ្មួញចូលមកមើលជាច្រើនដងហើយ ហើយថា ប្រសិនបើគ្មានការអនុញ្ញាតទេ ប្រហែលជាឈ្មួញមិនហ៊ានចូលទៅកាប់ឆៅៗយ៉ាងដូច្នេះទេ ដែលនេះ ត្រូវប្រជាពលរដ្ឋគិតថា អាចនឹងមានការឃុបឃិតគ្នារវាងអាជ្ញាធរមូលដ្ឋាន និងនាយកសាលា ក្នុងតម្លៃណាមួយជាមិនខាន ដូចដែលពាក្យគេនិយាយថា បើខ្មោចស្រុកមិនឲ្យដៃ ខ្មោចព្រៃក៏មិនហ៊ានចូលមកដែរ។
យ៉ាងណាក៏ដោយចំពោះករណីនេះ លោកមេឃុំបាស្រែ បានថ្លែងដោយបដិសេធថា លោកមិនបានដឹងរឿងនេះទេ ខណៈលោក ឡោ ចំរើន នាយកសាលាវត្តកោះ យើងមិនអាចទាក់ទងសុំការបំភ្លឺបាននៅឡើយទេនៅថ្ងៃនេះ។
សូមបញ្ជាក់ថា កាលពីព្រឹកថ្ងៃទី២៣ ខែតុលា ឆ្នាំ២០២១ ប្រជាពលរដ្ឋដែលរស់នៅក្បែរសាលាវត្តកោះ បានសម្តែងការភ្ញាក់ផ្អើល ក្រោយពីសំឡេងរ៉ឺណាយន្តបានបន្លឺឡើង ហើយពួកគាត់បានឃើញក្រុមអ្នកកាប់ឈើ បានកាត់មែក និងចុងដើមគីនីនដែលមានអាយុជិត១រយឆ្នាំនោះ ។ ក្រោយពីឃើញសកម្មភាពនេះ ក្រុមប្រជាពលរដ្ឋក៏មានការផ្អើលឆោឡោឡើង រួចក្រុមអ្នកអារឈើ ក៏បានបញ្ឈប់សកម្មភាពរបស់ខ្លួន ហើយក៏ចាកចេញអស់៕
