លោក គឹម ជុងអ៊ុន មេដឹកនាំកូរ៉េខាងជើង បានបង្ហាញខ្លួនជាសាធារណៈដ៏ភ្ញាក់ផ្អើល ក្រោយពីមានពាក្យចរចាមអារ៉ាម ជាច្រើននាពេលកន្លងមក ដោយថា លោកធ្លាក់ខ្លួនឈឺវះកាត់បេះដូង។
នៅថ្ងៃទី២ ខែឧសភា សារព័ត៌មានជាតិកូរ៉េខាងជើង KCNA បានផ្សាយថា មេដឹកនាំកូរ៉េខាងជើង គីម ជុងអ៊ុន បានបង្ហាញវត្តមាន ជាមួយប្អូនស្រី ក្នុងពិធីសម្ពោធរោងចក្រផលិតជីកសិកម្ម ។ ការបង្ហាញវត្តមាន បង្កឲ្យមានការភ្ញាក់ផ្អើលយ៉ាងខ្លាំង ដោយសារតែលោកមានសុខភាពល្អធម្មតា មិនមានជំងឺ ឬការវះកាត់ ដូចពាក្យចរចាមអារ៉ាមនោះឡើយ។
សារព័ត៌មានជាតិកូរ៉េខាងជើង KCNA បានផ្សាយថា លោក គីម ជុងអ៊ុន បានកាត់ខ្សែបូសម្ពោធរោងចក្រផលិតជីSunchon phosphatic នៅទីក្រុង Sunchon ភាគខាងជើងទីក្រុងព្យុងយ៉ាង។ ពលរដ្ឋ និងថ្នាក់ដឹកនាំកូរ៉េខាងជើងបានទះដៃអបអរសាទរ ដល់មេដឹកនាំជាន់ខ្ពស់ ដែលជាអ្នកជំរុញឲ្យមានការអភិវឌ្ឍន៍វិស័យឧស្សាហកម្ម គឺផលិតជីកាសិកម្មដោយខ្លួនឯង ជាការពង្រឹងដល់សេដ្ឋកិច្ចជាតិ។
តាមសារព័ត៌មាន KCNA ថា ក្នុងពិធីនោះមាន មន្ត្រីកូរ៉េខាងជើង ជាច្រើនរូប ក្នុងនោះមានប្អូនស្រី Kim Yo Jong ដែលជាស្ត្រីមានឥទ្ធិពលបំផុតរបស់កូរ៉េខាងជើង បន្ទាប់ពី មេដឹកនាំ គីម ជុងអ៊ុន។ លោកគឺ មានភាពសប្បាយរីករាយយ៉ាងខ្លាំងពេលកាត់ខ្សែបូសម្ពោធរោងចក្រខាងលើ ហើយតាមរយៈរូបភាព លោក គីម ជុងអ៊ុន មិនមានជំងឺអ្វីនោះឡើយ៕
