បន្ទាយមានជ័យ – នៅព្រឹកថ្ងៃចន្ទនេះ លោក វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ បានបង្ហោះរូប ពីសកម្មភាពការងារជាធម្មតារបស់លោកឡើងវិញទៅកាន់ខេត្តនៅជុំវិញតំបន់ទន្លេសាប បន្ទាប់ពីការធ្វើចត្តាឡីស័ករបស់លោកបានបញ្ចប់ ហើយពុំរកឃើញវិជ្ជមានវីរុសកូវីដ១៩។
លោក វេង សាខុន ចុះពិនិត្យការប្រមូលរបស់ពលរដ្ឋនៅបណ្តាខេត្តជុំវិញបឹងទន្លេសាប
លោក វេង សាខុន បានសរសេរនៅលើបណ្តាញសង្គមនៅព្រឹកនេះថា «ចប់កម្មវិធីនៅខេត្តបន្ទាយមានជ័យ នៅរសៀលថ្ងៃទី២ដដែល ឯកឧត្តមរដ្ឋមន្ត្រី រួមដំណើរជាមួយដោយឯកឧត្តម ប៉ែន កុសល អភិបាលនៃគណអភិបាលខេត្តឧត្តរមានជ័យ និងសហការីបានបន្តដំណើរមកពិនិត្យមើលរកទីតាំងថ្មីដែលត្រូវបង្កើតមជ្ឈមណ្ឌលផលិតពូជស្រូវ និងសកម្មភាពប្រមូលផលស្រូវរដូវរស្សានៅឃុំពង្រ ស្រុកចុងកាល់»។
ក្នុងនោះ បើតាមលោកអភិបាលខេត្តបន្ទាយមានជ័យថា ខេត្តនេះមានសំណាងល្អជាងខេត្តដទៃទៀតដែលមិនបានជួបគ្រោះមហន្តរាយទឹកជំនន់ធ្ងន់ធ្ងរដែលធ្វើឲ្យប៉ះពាល់ដំណាំស្រូវ។ នៅរដូវរស្សាកន្លងមកខេត្តសម្រេចដាំដុះស្រូវស្រាលដើមរដូវ ស្រូវកណ្តាល និងស្រូវធ្ងន់បានចំនួន ៩ ៥៧៨៦ហ.ត ហើយបច្ចុប្បន្នកំពុងមមាញឹកប្រមូលផលស្រូវជាបណ្តើរៗសរុបបានចំនួន ៤ ១៤៨០ហ.ត គិតមកទល់ថ្ងៃទី១៧ ខែវិច្ឆិកា ហើយអ្វីដែលប្រជាកសិករកំពុងប្រឈមគឺប្រមូលផលមិនទាន់ ដោយសារខ្វះម៉ាស៊ីនច្រូត។
រដ្ឋមន្រ្តីក្រសួងកសិកម្ម និងក្រុមការងារ
ជាមួយគ្នានេះដែរ លោករដ្ឋមន្ត្រីបានចូលរួមអបអរសាទរមន្ទីរកសិកម្ម រុក្ខាប្រមាញ់ និងនេសាទខេត្តដែលបានសម្រេច លើការងារបង្កបង្កើនផលតាមផែនការគ្រោងទុក ហើយលោកក៏បានលើកទឹកចិត្តឲ្យបងប្អូនខិតខំប្រមូលផលស្រូវឲ្យបានទាន់ពេលវេលា ចៀសវាងការខូចខាត និងបាត់បង់ទិន្នផល៕
