ព្រះសីហនុ – តាមការបញ្ជាក់នៅក្នុងសេចក្តីប្រកាសព័ត៌មាននៅព្រឹកថ្ងៃនេះ (២៥ កុម្ភៈ) ក្រសួងសុខាភិបាលបានឲ្យដឹងថា មានមនុស្សចំនួន៧នាក់ ដែលមិនពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ត្រូវគេរកឃើញវិជ្ជមានកូវីដ១៩ ដោយក្នុងនោះមានជនជាតិខ្មែរម្នាក់ ជាកងទ័ពមួកខៀវ ធ្វើដំណើរមកពីប្រទេសអាហ្រ្វិក និង ៦នាក់ទៀតជាជនជាតិចិននៅខេត្តព្រះសីហនុ។
មន្រ្តីរៀបចំការធ្វើតេស្តរកវីរុសកូវីដ១៩
ជនជាតិចិនទាំង៦នាក់ដែលស្នាក់នៅក្រុងព្រះសីហនុនេះ ពួកគាត់មានគោលបំណងធ្វើដំណើរទៅប្រទេសចិនវិញ ហើយក៏បានទៅធ្វើតេស្តដើម្បីសុំវិញ្ញាបនបត្របញ្ជាក់សុខភាពនៅថ្ងៃទី២៣ ខែកុម្ភៈ ឆ្នាំ២០២១។ លទ្ធផលធ្វើតេស្តសំណាករបស់ពួកគាត់ដែលផ្តល់ដោយវិទ្យាស្ថានជាតិសុខភាពសាធារណៈ នៃក្រសួងសុខាភិបាល បានបញ្ជាក់ថា ពួកគេមានវិជ្ជមានវីរុសកូវីដ១៩។
បច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ៕
