ត្បូងឃ្មុំ៖ យុវជនដែលនិយាយតាមរយៈបណ្តាញសង្គមថា អង្គរវត្ត មិនមែនជារបស់ខ្មែរ ត្រូវសមត្ថកិច្ចស្រាវជ្រាវចាប់ខ្លួនបានកាលពីរសៀលថ្ងៃទី៨ ខែកញ្ញា ឆ្នាំ២០២០ ក្រោមបញ្ជាផ្ទាល់របស់លោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំ។
យុវជនរូបនេះ មានឈ្មោះ ញ៉ែល ធារីណា អាយុ២៣ឆ្នាំ រស់នៅភូមិគោកស្រុក ឃុំគោកស្រុក ស្រុកតំបែរ ខេត្តត្បូងឃ្មុំ។ បច្ចុប្បន្នសមត្ថកិច្ចជំនាញ នៃស្នងការដ្ឋាននគរបាលខេត្តត្បូងឃ្មុំកំពុងសាកសួរដើម្បីចាត់ការតាមនីតិវិធី។
គួរបញ្ជាក់ថា កាលពីពេលថ្មីៗនេះ យុវជនរូបនេះ បានបង្ហោះសារវីដេអូនៅលើបណ្តាញសង្គម ដោយនិយាយថា «ម្នាក់ៗចូលចិត្តបង្ហោះរូបប្រាសាទអង្គរវត្ត ធ្វើដូចប្រាសាទអង្គរវត្តជារបស់ខ្មែរអ៊ីចឹង តាមពិត មិនមែនរបស់ខ្មែរទេ កុំបង្ហោះពេក បើអាច សម្រាកខ្លះទៅ ឈប់បានឈប់ទៅ មិនមែនរបស់ខ្លួនទេ»។
ការនិយាយបែបនេះ បង្ករឲ្យប្រជាពលរដ្ឋកម្ពុជាប្រតិកម្មទូទាំងប្រទេសតែម្ដង និងបានសំណូមពរឲ្យសមត្ថកិច្ចចាត់ការយុវជនរូបនេះតាមច្បាប់ដោយមិនត្រូវលេីកលែងឡេីយ៕
