ខេត្តព្រះសីហនុ ៖ កម្លាំងកងរាជអាវុធហត្ថស្រុកកំពង់សីលា សហការជាមួយកម្លាំងអាវុធហត្ថស្នាក់ការសន្តិសុខ៤០២ កាលពីយប់ ថ្ងៃទី២៩ ខែតុលា ឆ្នាំ២០២០ បានឃាត់ខ្លួនជនសង្ស័យ១នាក់ ពាក់ព័ន្ធករណីយកកាំបិតចូលទៅគំរាមប្លន់កន្លែងវេរលុយវីង នៅចំណុច ភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ។
មន្រ្តីកងរាជអាវុធហត្ថស្រុកកំពង់សីលា បានឲ្យដឹងថា ជនសង្ស័យមានឈ្មោះ ខន ម៉ៅ (ហៅ អាម៉ៅ) ភេទប្រុស អាយុ៣៣ឆ្នាំ។
ចំណែកជនរងគ្រោះឈ្មោះ អ៊ុំ ចន្ធី ភេទស្រី អាយុ៣៩ មានមុខរបរភ្នាក់ងារវីងវេរលុយហុង រ៉ា មានទីលំនៅបច្ចុប្បន្ន ភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ រងរបួសកំភួនដៃខាងឆ្វេង និងកំភ្លៅខាងឆ្វេង។
នៅក្នុងករណីខាងលើនេះ សមត្ថកិច្ចបានដកហូតវត្ថុតាងរួមមាន៖ លុយចំនួន ៥.០៩៨.៥០០រៀល, កាបូបខ្មៅ ចំនួន០២, លោហៈធាតុពណ៌លឿង ១ខ្សែរ, មួកពណ៌ខ្មៅ ម៉ាកPedro មួយ, កាំបិតបុ័ងតោ ០១, អាវភ្លៀង ០១, ម៉ាស់ ០១, ខោជេីងវែងពណ៌ គគី ម៉ាកLee ០១, អាវកីឡាដៃខ្លី ពណ៌ទឹកប៊ីចចំនួន ០១។
បច្ចុប្បន្នជនសង្ស័យ ត្រូវបានកម្លាំងសមត្ថកិច្ចកំពុងធ្វើការសាកសួរនៅមូលដ្ឋានកងរាជអាវុធហត្ថស្រុកកំពង់សីលា ដើម្បីចាត់ការតាមនិតិវិធីច្បាប់៕ ដោយ : នាគសមុទ្រ