(កំពង់ស្ពឺ)៖ យោងតាមសេចក្តីរាយការណ៍បានឲ្យដឹងថា កាលពីអំឡុងចុងខែតុលានេះ មានឈ្មួញដ៏មានឥទ្ឋិពលប្រចាំស្រុកភ្នំស្រួច នៃខេត្តកំពង់ស្ពឺម្នាក់ ដែលគេដឹងថា មានឈ្មោះ មែន ភីរីណា ជាមន្ត្រីអាវុធហត្ថផងនោះ បានយករថយន្តកង់ដប់ មកដឹកជញ្ជូនឈើដែលមានមុខកាត់ធំៗ ចេញពីស្រុកភ្នំស្រួច ទៅកាន់រាជធានីភ្នំពេញ ដោយមិនញញើតសមត្ថកិច្ចឡើយ។
បើតាមសេចក្តីរាយការណ៍ថា ការដឹកជញ្ជូនឈើនេះ មិនមែនជាលើកទី១របស់លោក មែន ភីរីណា នោះទេ ដោយមន្រ្តីអាវុធហត្ថរូបនេះ បានធ្វើសកម្មភាពជាច្រើនដងមកហើយ ដោយគេដឹកជញ្ជូនឈើចេញពីភូមិនានាដែលលាក់ទុកក្នុងព្រៃ ខ្លះក្រោយផ្ទះប្រជាពលរដ្ឋ ហើយរាល់ការដឹកជញ្ជូនឈើម្តងៗឈ្មោះនេះតែងតែនិយាយអួតក្អេងក្អាងថា គ្មានអ្នកណាហ៊ានបង្ក្រាបការដឹកឈើរបស់គេនោះទេ ព្រោះថ្នាក់ដឹកនាំខេត្តទាំងមូលគឺសុទ្ឋតែជាគ្នីគ្នារបស់គេអស់ហើយ លើសពីនេះទៅទៀតការរកស៊ីដឹកឈើនេះ គឺគេរកស៊ីដើម្បីចិញ្ចឹមអង្គភាព ដូចច្នេះគ្មានអ្នកណាហ៊ានបង្ក្រាបការដឹកឈើរបស់គេឡើយ។
ពាក់ព័ន្ឋនឹងករណីនេះ យើងមិនអាចសុំការបកស្រាយពីលោក មែន ភីរីណា បាននៅឡើយទេនៅថ្ងៃនេះ។
យ៉ាងណាក៏ដោយ ប្រជាពលរដ្ឋបានសំណូមពរដល់លោកនាយឧត្តមសេនីយ៍ សៅសុខា មេបញ្ជាការកងរាជអាវុធហត្ថលើផ្ទៃប្រទេស សូមមេត្តាចាត់ក្រុមបង្ក្រាបថ្នាក់ជាតិ ចុះមកបង្ក្រាបករណីកាប់ និងដឹកជញ្ជូនឈើនៅស្រុកភ្នំស្រួចផង ដើម្បីទប់ស្កាត់ការកាប់បំផ្លាញធនធានធម្មជាតិ ដែលបង្កឡើងដោយអ្នកពាក់ស្បែកខ្លាបន្តទៅទៀត៕
អត្ថបទ៖ នាងខ្មៅ
