តាកែវ៖ ប្រជាពលរដ្ឋបានឲ្យដឹងថា កាលពីពេលថ្មីៗនេះ ក្រុមមន្រ្តីសាលាស្រុកអង្គរបូរី ដែលរួមមានទាំងកម្លាំងប្រដាប់អាវុធផង បានចុះទៅឃាត់គ្រឿងចក្រ ដែលពួកគាត់បានជួលឲ្យកាយដីស្រែយកទៅរក្សាទុកនៅសាលាស្រុក ហើយគិតមកទល់ពេលនេះ គឺមានរយៈពេលជិត១សប្តាហ៍ហើយ ដោយមិនបានដោះស្រាយទេ បើទោះបីជាករណីកាយដីនេះ ពួកគាត់បានសុំច្បាប់ និងអនុញ្ញាតពីលោក ឌឹម គឹមសាន អភិបាលស្រុកអង្គរបូរីក៏ដោយ។
ពួកគាត់ថា មុននឹងជួលគ្រឿងចក្រមកកាយដីស្រែនេះ គឺគាត់បានសុំច្បាប់ពីសាលាស្រុក ដោយមានការឯកភាពពីលោក ឌឹម គឹមសាន្ត អភិបាលស្រុកអង្គរបូរី ត្រឹមត្រូវ, តែនៅពេលដែលពួកគាត់ជួលគ្រឿងចក្រទៅកាយដី ស្រាប់តែមានក្រុមអាជ្ញាធរបានចុះទៅហាមឃាត់ និងយកគ្រឿងចក្រនោះទៅរក្សាទុកនៅសាលាស្រុក ដោយមិនព្រមធ្វើការដោះស្រាយនោះទេ។
ពាក់ព័ន្ធករណីនេះ លោក រស់ រ័ត្ន អភិបាលរងស្រុកអង្គរបូរីបានថ្លែងថា ករណីគ្រឿងចក្រនោះ គឺលោកបានដឹកនាំកម្លាំងចុះទៅឃាត់ និងនាំយកមកសាលាស្រុក ដោយសារតែលោកបានទទួលបណ្តឹងថា គ្រឿងចក្រនោះបានកាយដីទួល ពុំសុំការអនុញ្ញាតិ។
យ៉ាងណាក៏ដោយ លោក រស់ រ័ត្ន បានបញ្ជាក់ថា ការឃាត់យកមកទុកនេះ គឺគ្រាន់តែយកមកណែនាំអប់រំប៉ុណ្ណោះ ដោយមិនផាកពិន័យជាលុយកាក់អ្វីទេ ហើយថា ការឃាត់ទុកនេះ គឺមិនដល់១ឆ្នាំ ឬ២ឆ្នាំនោះឡើយ ៕