(ភ្នំពេញ) – ក្នុងរយៈពេលប៉ុន្មានថ្ងៃមកនេះ មានការត្អូញត្អែពីអ្នកចិញ្ចឹមសត្វយកពង ក្រោយពីតម្លៃស៊ុតនៅលើទីផ្សារបានចុះថោកក្រោម ៣០០រៀលក្នុងមួយគ្រាប់ ដោយមានការលើកឡើងថា ការធ្លាក់ចុះថ្លៃនេះ គឺដោយសារតែមានការនាំចូលស៊ុតពីប្រទេសជិតខាង។
ចំពោះករណីនេះ ក្រសួងកសិកម្មបានបកស្រាយថា ការចុះថោកនេះ មិនមែនមកពីការនាំចូលស៊ុតពីប្រទេសជិតខាងនោះទេ ព្រោះថា ក្រសួងពុំដែលបានអនុញ្ញាតជាគោលការណ៍ឲ្យនាំចូលស៊ុតពីប្រទេសជិតខាង ពិសេសប្រទេសវៀតណាម ចូលមកទីផ្សារកម្ពុជាឡើយ។
ក្រសួងថា ការចុះថោកនៃតម្លៃស៊ុតនេះ គឺដោយសារតែស្ថានភាពជំងឺកូវីដ១៩ បានគំរាមកំហែងដល់សុខភាពសាធារណៈ ហើយកម្មវិធីជួបជុំផ្សេងៗត្រូវបានផ្អាក ដែលធ្វើឲ្យតម្រូវការស៊ុតត្រូវបានកាត់បន្ថយជាអតិបរិមា ខណៈដែលការចិញ្ចឹមបក្សីយកស៊ុតមានការកើនឡើងនៅគ្រប់តំបន់ទូទាំងប្រទេស ម្យ៉ាងទៀតនៅក្នុងរដូវត្រីត្រូវ ប្រជាពលរដ្ឋមួយចំនួន បែរមកបរិភោគត្រីជំនួសឲ្យស៊ុតបក្សីវិញ៕