បរទេស ៖ ក្នុងឱកាសឆ្លងឆ្នាំសាកលចូលឆ្នាំ២០២១នេះ នៅទីក្រុងវូហាន ប្រទេសចិន ទីដែលចាប់ផ្តើមផ្ទុះជំងឺកូវីដ១៩ដំបូងកាលពីមួយឆ្នាំមុន ពោលគឺនៅថ្ងៃទី៣១ ខែធ្នូ ឆ្នាំ២០១៩ គេឃើញមានមនុស្សរាប់ពាន់នាក់បានប្រមូលផ្តុំគ្នានៅតាមដងផ្លូវនានា ដើម្បីអបអរពិធីបុណ្យឆ្លងឆ្នាំ។
សូមបញ្ជាក់ថា ក្រោយពីការផ្ទុះនៃវីរុសកូវីដ១៩ ទីក្រុងវូហាន ត្រូវបានបិទមិនឲ្យមានការចេញចូល រហូតដល់ខែឧសភា ទើបទីក្រុងមួយនេះវិលមករកភាពប្រក្រតីឡើងវិញ ក្រោយពីគេអាចគ្រប់គ្រងជំងឺនេះបាន ហើយពលរដ្ឋចំនួន ១១លាននាក់នៅទីក្រុងនោះ បានវិលមករកជីវភាពធម្មតាឡើងវិញ។
ផ្ទុយពីទីក្រុងវូហាន ប្រទេសចិន នៅទីក្រុងញូវយ៉ក សហរដ្ឋអាមេរិកវិញ គឺប្រែជាស្ងប់ស្ងាត់, នៅសប្តាហ៍នេះ គឺជាសប្តាហ៍ដែលមានគ្រោះថ្នាក់បំផុតនៅសហរដ្ឋអាមេរិកចាប់តាំងពីជំងឺរាតត្បាតរីករាលដាល។
រដ្ឋនៅទូទាំងសហរដ្ឋអាមេរិកបានរាយការណ៍ថា មានមនុស្សជាង ៣.៩០០នាក់បានស្លាប់ដោយសារជំងឺកូវីដ១៩កាលពីថ្ងៃពុធ និងជាង ១២៥.០០០ នាក់កំពុងសម្រាកនៅមន្ទីរពេទ្យ។
ក្រៅពីសហរដ្ឋអាមេរិក ទីក្រុងឡុងដ៏ នៃប្រទេសអង់គ្លេស, ទីក្រុងប៉ារីស នៃប្រទេសបារាំង, អ៊ីតាលី ជាដើម ពិធីបុណ្យឆ្លងឆ្នាំសាកល គឺត្រូវធ្វើឡើងដោយស្ងប់ស្ងាត់។