ភ្នំពេញ – ជាការឆ្លើយតបទៅនឹងសំណួរដែលថា តើប្រេងរបស់កម្ពុជា នឹងជះឥទ្ធិពលប៉ុណ្ណាដល់សេដ្ឋកិច្ចប្រទេសកម្ពុជានោះ? នៅព្រឹកថ្ងៃទី១ កុម្ភៈ ក្នុងឱកាសចូលរួមពិធីបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជាបានបញ្ជាក់ថា ចំណូលពីការលក់ប្រេងរបស់កម្ពុជា គឺមិនជះឥទ្ធិពលលើសេដ្ឋកិច្ចរបស់កម្ពុជាបច្ចុប្បន្ននោះទេ។
សម្តេចតេជោបានលើកឡើង តំណក់ប្រេងដំបូងរបស់កម្ពុជា ដែលទទួលបាននៅថ្ងៃទី២៩ ខែធ្នូ ឆ្នាំ២០២០នោះ អណ្តូងទី១ ដំណើរការបាន ៣៣ថ្ងៃ បូមបាន ១,២៣៦បារ៉ែល ក្នុងមួយថ្ងៃ។ រយៈពេល ៣៣ថ្ងៃ ផលិតបាន ៤០,៧៨៨បារ៉ែល។ តាមការវាយតម្លៃ កម្ពុជាអាចចម្រាញ់ប្រេងបានចន្លោះពី ៧ពាន់ ទៅ ៧,៥០០បារ៉ែលប៉ុណ្ណោះក្នុងមួយថ្ងៃ ដែលជានេះជាចំនួនមួយតិចតួចនៅឡើយ វាមិនទាន់ជះឥទ្ធិពលទៅលើផ្នែកសេដ្ឋកិច្ចទេ ប៉ុន្តែយ៉ាងណាក៏ដោយវាជាការចាប់ផ្តើមមួយដ៏ល្អនៃឧស្សាហកម្មប្រេង និងឧស្ម័ននៅកម្ពុជា៕