តាកែវ – តាមសេចក្តីរាយការណ៍របស់ប្រជាពលរដ្ឋបានឲ្យដឹងថា ទីតាំងចិញ្ចឹមទារដែលរងការរិះគន់ពីប្រជាពលរដ្ឋស្ថិតនៅក្នុងភូមិរំលក ឃុំបាស្រែ ស្រុកអង្គរបូរីនោះ មកទល់នឹងពេលនេះ នៅមិនទាន់បានរុះរើនៅឡើយទេ។
អាជ្ញាធរស្រុកអង្គរបូរី កាលពីពាក់កណ្តាលខែធ្នូ ឆ្នាំ២០២០ បានជូនដំណឹងទៅដល់ម្ចាស់កសិដ្ឋាន ដែលមានឈ្មោះ ប៉ុល សំអាត ឲ្យបញ្ឈប់ការចិញ្ចឹមទានៅទីតាំងដែលមានផលប៉ះពាល់ស្ថិតក្នុងភូមិរំលកនោះ យ៉ាងយូរត្រឹមបំណាច់ខែមករា ឆ្នាំ២០២១, តែមកទល់ពេលនេះ ម្ចាស់ទីតាំងមិនបានរុះរើឡើយ ហើយបើតាមប្រភពខ្លះថា ការដែលម្ចាស់កសិដ្ឋានចិញ្ចឹមទានេះមិនរុះរើ ក៏ព្រោះតែគេអាងមានលោក ខាន់ អ៊ីម សាមជិកក្រុមប្រឹក្សាស្រុកអង្គរបូរី នៅពីក្រោយខ្នង។
យ៉ាងណាក៏ដោយ គេរំពឹងថា អាជ្ញាធរស្រុកអង្គរបូរី នឹងអនុវត្តសេចក្តីជូនដំណឹងរបស់ខ្លួនឲ្យមានប្រសិទ្ធភាព។
គួរបញ្ជាក់ដែរថា ទីតាំងចិញ្ចឹមទារបស់ឈ្មោះ ប៉ុល សំអាត ស្ថិតនៅភូមិរំលក ឃុំបាស្រែ ស្រុកអង្គរបូរី ត្រូវបានប្រជាពលរដ្ឋរស់នៅក្នុងភូមិប្តឹងតវ៉ាទៅកាន់អាជ្ញាធរ កាលពីពាក់កណ្តាលឆ្នាំ២០២០ ព្រោះតែវាស្ថិតនៅក្បែរភូមិ និងសាលារៀន ដែលវាជះក្លិន និងប៉ះពាល់ដល់បរិស្ថាន ព្រមទាំងដំណាំរបស់ប្រជាពលរដ្ឋ, ក្រោយពីមានការតវ៉ានោះមិនបានប៉ុន្មានផង ឈ្មួញឈ្មោះ ប៉ុល សំអាត ក៏បានដឹកទាប្រមាណ២ពាន់ក្បាលមកដាក់នៅទីតាំងនោះ ទោះអាជ្ញាធរឃុំមិនឯកភាពក៏ដោយ។ យ៉ាងណាក៏ដោយ ក្រោយមក ទើបអាជ្ញាធរស្រុកអង្គរបូរីបានចុះមកពិនិត្យ និងធ្វើការហាមឃាត់ ដោយដាក់ឱសានុវាទឲ្យម្ចាស់កសិដ្ឋានផ្លាស់ប្តូរទីតាំងឲ្យរួចរាល់នៅបំណាច់ខែមករា ឆ្នាំ២០២១៕