ភ្នំពេញ – ក្រុមប្រឹក្សាអភិវឌ្ឍន៍កម្ពុជា (CDC) កាលពីពេលថ្មីៗនេះ បានសម្រេចអនុញ្ញាតឲ្យក្រុមហ៊ុនចំនួន២បើករោងចក្រតម្លើងកង់បីអគ្គិសនី និងរោងចក្រផលិតគ្រឿងសង្ហារឹម ដោយមានទុនវិនិយោគសរុបចំនួនជិត ៧០លានដុល្លារអាមេរិក។
ក្នុងនោះក្រុមហ៊ុន ONION MOBILITY CO., LTD នឹងបង្កើតរោងចក្រផ្គុំតម្លើងទោចក្រយានយន្ត និងត្រីចក្រយានយន្តប្រើដោយថាមពលអគ្គិសនី ដោយមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល, មានទុនវិនិយោគប្រមាណ ២០លានដុល្លារអាមេរិក និងអាចបង្កើតការងារបានចំនួន ៣៨០កន្លែង។
ក្រុមហ៊ុន SHANE (CAMBODIA) FURNITURE CO., LTD នឹងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង, មានទុនវិនិយោគប្រមាណ ៤៧,៧លានដុល្លារអាមេរិក និងអាចបង្កើតការងារបានចំនួន ៨២០កន្លែង៕