តាកែវ – តាមសេចក្តីរាយការណ៍បានឲ្យដឹងថា បច្ចុប្បន្ននេះបទល្មើសឆក់ត្រីកំពុងតែកើតមានយ៉ាងគគ្រឹកគគ្រេងនៅតាមបឹង ក្នុងភូមិសាស្រ្តឃុំគោកព្រេច ឃុំរាមអណ្តើក ស្រុកគិរីវង់ ខេត្តតាកែវ ដែលគេពុំបានឃើញមន្រ្តីជលផល ជាពិសេសលោក គឹម សារិទ្ធ ដែលគេដឹងថា គឺជាមន្រ្តីជលផលជើងខ្លាំងប្រចាំខេត្តតាកែវ ចុះទៅធ្វើការបង្រ្កាបឡើយ តែបែរជាគេឃើញគាត់ចុះទៅចាប់ពងទាប្រជាពលរដ្ឋ ដែលជាតួនាទីរបស់មន្រ្តីបសុពេទ្យទៅវិញ។
ប្រជាពលរដ្ឋថា សកម្មភាពឆក់ត្រីនៅភូមិសាស្រ្តខាងលើនេះ គឺបានកើតឡើងយ៉ាងគគ្រឹកគគ្រេង ដោយពួកគាត់ពុំឃើញសមត្ថកិច្ចពាក់ព័ន្ធ ជាពិសេសមន្រ្តីជលផលចុះទៅបង្រ្កាបឡើយ ដែលធ្វើឲ្យពួកគាត់មានការបារម្ភយ៉ាងខ្លាំង ពីការបាត់បង់ពូជត្រីនាថ្ងៃអនាគត។
យ៉ាងណាក៏ដោយ ប្រជាពលរដ្ឋរំពឹងថា មន្រ្តីជលផលខេត្តតាកែវនឹងអនុវត្តន៍នូវការងាររបស់ខ្លួនឲ្យសមស្របទៅនឹងមន្រ្តីអនុវត្តច្បាប់ ក្នុងការទប់ស្កាត់បទល្មើសនេសាទ ដោយមិនធ្មេចភ្នែកអនុវត្តខុសតួនាទីរបស់ខ្លួន ព្រោះតែផលប្រយោជន៍ផ្ទាល់ខ្លួននោះទេ៕
