(ភ្នំពេញ) – ក្នុងសារលិខិត អបអរទិវាសេរីភាពសារព័ត៌មានសកលលោក លើកទី២៧ សម្តេចតេជោ ហ៊ុន សែន នាយករដ្ឋមន្រ្តី បានលើកឡើងថា ថ្វីត្បិតតែការឆ្លងរីករាលដាលវីរុសកូវីដ១៩ មានលក្ខណៈកាចសាហាវ និងបង្កគ្រោះថ្នាក់យ៉ាងធ្ងន់ធ្ងរដល់អាយុជីវិតមនុស្សនៅលើសកលលោកទាំងមូលក៏ដោយ ក៏ជំងឺនេះមិនបង្កគ្រោះថ្នាក់ពិសពុលកាចសាហាវ ដូចការផ្សព្វផ្សាយព័ត៌មានក្លែងបន្លំតាមប្រព័ន្ធផ្សព្វផ្សាយ និងបណ្តាញទំនាក់ទំនងសង្គមមួយចំនួន។
សម្តេចបញ្ជាក់ថា ក្នុងកាលៈទេសៈដែលប្រទេសកម្ពុជា ក៏ដូចជាសកលលោកទាំងមូលកំពុងជួបប្រទះមហន្តរាយ នៃការឆ្លងរីករាលដាល នៃវីរុសកូវីដ១៩ ពួកគេបានផ្សព្វផ្សាយព័ត៌មានក្លែងបន្លំបង្កចលាចល ភាពវឹកវរនៅក្នុងសង្គម និងធ្វើឲ្យប្រជាជនកើតជំងឺភ័យខ្លាច ហើយទម្លាក់កំហុស និងវាយប្រហារមកលើរាជរដ្ឋាភិបាលកម្ពុជា។
ជាមួយគ្នានេះ សម្តេចតេជោក៏សូមអំពាវនាវដល់បងប្អូនអ្នកសារព័ត៌មានទាំងអស់ ចូលរួមឲ្យបានសកម្មថែមទៀតក្នុងការប្រយុទ្ធប្រឆាំងនឹងព័ត៌មានក្លែងក្លាយបន្លំតាមប្រព័ន្ធផ្សព្វផ្សាយ និងបណ្តាញទំនាក់ទំនងសង្គមនានា ដោយការផ្សាយព័ត៌មានពិត ដើម្បីបន្សាបព័ត៌មានក្លែងបន្លំ ឲ្យប្រជាពលរដ្ឋបានយល់ដឹងទាន់សភាពការណ៍។
សម្តេចតេជោក៏បានបញ្ជាក់ជាថ្មីដែរថា រាជរដ្ឋាភិបាលកម្ពុជា គាំទ្រ និងលើកកម្ពស់សិទ្ធិ សេរីភាព នៃការបញ្ចេញមតិ និងសេរីភាពខាងសារព័ត៌មាន ដែលត្រូវធានាដោយរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តីពីរបបសារព័ត៌មាន ដែលធានានូវឯករាជ្យភាព នៃការផ្សាយព័ត៌មានដោយគ្មានការត្រួតពិនិត្យជាមុន សិទ្ធិនៃការរក្សាការសម្ងាត់ស្តីពីប្រភពព័ត៌មានរបស់ខ្លួន៕