សិប្បកម្មសូត្រមាសភាច (Golden Silk Pheach) ជាសិប្បកម្មដ៏កម្រមួយដែលផលិតសរសៃសូត្របានយ៉ាងប្រណិត ដើម្បីត្បាញជាចរបាប់យ៉ាងល្អប្រណីត ហើយអាចលក់បានតម្លៃខ្ពស់ដល់ជាង១ម៉ឺនដុល្លារអាមេរិកនៅក្នុងមួយក្បិន។
លោក ឃឹម ហ្វីណង់ អភិបាលស្រុកបន្ទាយស្រីបានឲ្យដឹងថា ចរបាប់ឬសារបាប់ ជាប្រភេទសំពត់មានសាច់ក្រាស់ធ្ងន់ ត្បាញដោយសូត្រលាយចេសមាស លើកជាគោមរំលេចដោយក្បាច់រចនាយ៉ាងល្អប្រណិតបំផុត ដែលពីសម័យបុរាណគេទុកប្រើប្រាស់សំរាប់តែត្រកូលក្សត្រ ដោយការត្បាញគឺត្រូវប្រើរយៈពេលប្រមាណពី ១ទៅ២ឆ្នាំ។
លោកបានបន្តថា សិប្បកម្មសូត្រមាសភាច ស្ថិតនៅភូមិប្រីយ៍ ឃុំខ្នារសណ្តាយ ស្រុកបន្ទាយស្រី ខេត្តសៀមរាប មានសមាជិកជាង២០នាក់ ជាសិប្បកម្មដែលមានលក្ខណៈពិសេសដាច់គេម្យ៉ាង អាចផលិតវត្ថុធាតុដើមដោយខ្លួនឯងផ្ទាល់ ចាប់តាំងពីការដាំដើមមន ការចិញ្ចឹមដង្កូវនាង រហូតដល់ការត្បាញបានសំរេច ដែលសឹងតែមិនមានសិប្បកម្មណាអាចធ្វើបែបនេះបាននោះឡើយ។
“តាមដឹងគឺយើងមិនមានកន្លែងណាដែលអាចធ្វើបានក្នុងកម្រិតគុណភាពបែបនេះទេ ព្រោះយើងឃើញថា កន្លងមក មានការធ្វើក្នុងទម្រង់ផ្សេងៗគ្នា ឧទាហរណ៍ដូចជានៅក្នុងស្រុក គាត់មានការផលិតដែr ប៉ុន្តែនៅទីនោះគាត់ធ្វើជាលក្ខណៈសាមញ្ញធម្មតា ហើយកន្លែងខ្លះទៀត គាត់អាចមានលក្ខណៈជាត្បាញ ប៉ុន្តែយកវត្ថុធាតុដើមពីខាងក្រៅដើម្បីយកមកត្បាញក្នុងប្រទេសកម្ពុជា ដោយឡែកនៅក្នុងសិប្បកម្មសូត្រមាសភាចនេះ គឺគាត់ធ្វើដោយខ្លួនឯង គឺការផលិតដោយខ្លួនឯង វត្ថុធាតុដើមខ្លួនឯងសុទ្ធសាធ ហើយគាត់ធ្វើដល់ទីបញ្ចប់នៅក្នុងកម្រិតគុណភាពខ្ពស់ សម្រាប់តែការនាំចេញ ឬក៏ជាស្នាដៃបែបសិល្បៈដែលមានកម្រិតខ្ពស់”៕