(ភ្នំពេញ) ៖ ដើម្បីចូលរួមចំណែកដល់កិច្ចខិតខំប្រឹងប្រែងអន្តរជាតិក្នុងការដោះស្រាយបញ្ហារាតត្បាតនៃជំងឺកូវីដ–១៩ និងជាពិសេសដើម្បីទប់ស្កាត់ការរាលដាល នៃជំងឺនេះនៅកម្ពុជា រាជរដ្ឋាភិបាលជប៉ុនបានសម្រេចផ្តល់ជំនួយសង្គ្រោះបន្ទាន់ ដែលរួមមានគ្រឿងបរិក្ខារវេជ្ជសាស្ត្រនិងជំនួយបច្ចេកទេសគិតជាទឹកប្រាក់ចំនួន ៦.៣២០.១៦៧ដុល្លារអាម៉េរិក ;ជូនដល់រាជរដ្ឋាភិបាលកម្ពុជាតាមរយៈការិយាល័យអង្គការសហប្រជាជាតិសម្រាប់សេវាកម្មគម្រោង(UNOPS)។ នេះបើតាមសេចក្តីប្រកាសព័ត៍មានរបស់ក្រសួងការបរទេសកម្ពុជា។
ចំពោះសមានចិត្តគាំទ្ររបស់រដ្ឋាភិបាលជប៉ុនក្នុងអំឡុងពេលនិងកាលៈទេសៈលំបាកមិនធ្លាប់មាននេះ រាជរដ្ឋាភិបាលកម្ពុជា ក៏បានសម្តែងនូវការប្តេជ្ញាប្រើប្រាស់ជំនួយសង្រ្គោះបន្ទាន់ដ៏មានតម្លៃនេះដើម្បីដោះស្រាយប្រកបដោយប្រសិទ្ធភាពនូវគ្រោះមហន្តរាយសុខភាពសកលបណ្តាលពីជំងឺកូវីដ–១៩ និងស្តារឡើងវិញចំពោះផលប៉ះពាល់ទាំងឡាយផ្នែកសេដ្ឋកិច្ចនិងសង្គមព្រមទាំងធានាបាននូវសុខុមាលភាពរបស់ប្រជាជនកម្ពុជា៕
