(ភ្នំពេញ)៖ ក្រសួងសុខាភិបាលកម្ពុជា កាលពីថ្ងៃម្សិលមិញនេះ បានជូនដំណឹងដល់គ្រប់អភិបាលរាជធានីខេត្តទាំងអស់នៅទូទាំងប្រទេស ពិសេសខេត្តជាប់ព្រំដែនប្រទេសវៀតណាម ដូចជាខេត្តកណ្តាល ស្វាយរៀង ព្រៃវែង ត្បូងឃ្មុំ កំពត រតនគិរី មណ្ឌលគិរី កែប និងតាកែវ ឲ្យមានការប្រុងប្រយ័ត្ន និងបង្ការពីការរីករាលដាលនៃជំងឺផ្តាសាយបក្សី H5N1។
ជំងឺផ្តាសាយបក្សីកំពុងតែរាលដាលនៅភាគខាងត្បូងប្រទេសវៀតណាម
ដោយក្នុងនោះអាជ្ញាធរខេត្តត្រូវបង្កើនការប្រុងប្រយ័ត្ន និងធ្វើការណែនាំអប់រំដល់ប្រជាពលរដ្ឋ មិនត្រូវទទួលទានសត្វបក្សីឈឺ ឬងាប់ និងរាល់បសុបក្សីសម្រាប់បរិភោគ ត្រូវចំអិនឲ្យបានឆ្អិនល្អ។ ត្រូវលាងដៃឲ្យបានញឹកញាប់ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះពាល់ផ្ទាល់ជាមួយបសុបក្សី។
ហើយបើបុគ្គលណាម្នាក់មានគ្រុនក្តៅលើសពី ៣៨,៥អង្សាសេ ក្អក ពិបាកដកដង្ហើម និងមានប្រវត្តិប៉ះពាល់ជាមួយបសុបក្សីឈឺ ឬងាប់ ក្នុងអំឡុងពេល១៤ថ្ងៃ មុនចេញរោគសញ្ញា សូមទំនាក់ទំនងទូរស័ព្ទទាន់ហេតុការណ៍ 115៕
