(ភ្នំពេញ)៖ ក្រុងសៀមរាប បានទទួលចំណាត់ថ្នាក់លេខ១ ជាទីក្រុងដែលមានពិធីបុណ្យឆ្លងឆ្នាំសកលល្អជាងប្រចាំឆ្នាំ២០១៩ ខណៈដែលរាជធានីភ្នំពេញទទួលបានលេខ២ និងក្រុងកែបទទួលបានចំណាត់ថ្នាក់លេខ៣។
លោក តុប សុភ័ក្រ អ្នកនាំពាក្យក្រសួងទេសចរណ៍បានថ្លែងថា លទ្ធផលនៃការប្រឡងទីក្រុងដែលមានពិធីបុណ្យឆ្លងឆ្នាំសកលល្អជាងប្រចាំឆ្នាំរបស់ក្រុងសៀមរាបនេះ ត្រូវបានវាយតម្លៃទៅលើការតុបតែងលំអ អនាម័យ បរិស្ថាន សន្តិសុខ សុវត្ថិភាព និងសណ្តាប់ធ្នាប់ ដើម្បីទទួលបាននូវភាពពេញ ការសប្បាយរីករាយរបស់ភ្ញៀវទេសចរនិងអ្នកចូលរួម ។
លោកថា លទ្ធផលនៃចំណាត់ថ្នាក់នេះ គឺទទួលបានតាមរយៈការបោះឆ្នោតនៃអ្នកចូលរួម ដោយទទួលបាន៣ក្រុង គឺ សៀមរាប រាជធានីភ្នំពេញនិងក្រុងកែប ដែលទទួលបានចំណាត់ថ្នាក់។ ហើយចំណុចសំខាន់នោះ គឺយើងចង់បង្ហាញអំពីការអភិវឌ្ឍរបស់ស្រុកយើង ក៏ដូចជាការរៀបចំឲ្យបានល្អ សម្រាប់ការទាក់ទាញទេសចរ៕