ភ្នំពេញ៖ រដ្ឋបាលរាជធានីភ្នំពេញបានឲ្យដឹងថា កាលពីពេលថ្មីៗនេះ មានករណីជនខិលខូចមួយក្រុមតូច បានឆ្លៀតឱកាសក្លែងបន្លំខ្លួនជាមន្រ្តីរបស់រដ្ឋករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ ធ្វើការឆបោកអតិថិជនឲ្យធ្វើការបង់ថ្លៃសេវាប្រមូលសំរាម និងសំណល់រឹង ដោយចេញជាមូលប្បទានបត្រ ឬទូទាត់ជាសាច់ប្រាក់ដោយផ្ទាល់ជាមួយពួកគេ។
តាមការបញ្ជាក់របស់រដ្ឋបាលរាជធានីភ្នំពេញ ការទូទាត់ថ្លៃសំរាម គឺតម្រូវឲ្យអតិថិជនត្រូវបង់តាមប្រព័ន្ធទូទាត់អេឡិចត្រូនិច (តាមទូរស័ព្ទដៃ) ឬបញ្ជរទូទាត់នៅធនាគារ ACLEDA, ABA, WING, AMK, WB Finace, Prince Bank, ស្ថាបនា ឬតាមភ្នាក់ងារទូទាត់ផ្សេងៗទៀតដូចជា eMONEY, Lyhour Weiluy, Pi Pay និង Dara Pay។
ដូច្នេះ ក្នុងករណីដែលបងប្អូនប្រជាពលរដ្ឋម្ចាស់អាជីវកម្ម សេវាកម្ម និងស្ថាប័នឯកជនទាំងអស់ ជួបប្រទះនូវបញ្ហាការឆបោកដូចបានរៀបរាប់ខាងលើ សូមកុំធ្វើតាមការឆបោកនោះ ហើយសូមរាយការណ៍តាមរយៈប្រព័ន្ធទូរស័ព្ទលេខ 087 258 835 ឬរាយការណ៍ជូនទៅអាជ្ញាធរមានសមត្ថកិច្ច៕