(ភ្នំពេញ)៖ លោក គ្រុយ លឹមហេង ដែលគេដឹងថា គឺជាអតីតអគ្គកុងស៊ុលកម្ពុជាប្រចាំទីក្រុងគុនមិញ ខេត្តយូណាន ប្រទេសចិន ត្រូវតុលាការប្រកាសសាលក្រមនៅព្រឹកថ្ងៃទី៨ តុលា នេះ ដោយផ្តន្ទាទោសដាក់ពន្ធនាគាររយៈពេល៧ឆ្នាំ និងពិន័យជាប្រាក់ចំនួន១០លានរៀលចូលថវិការដ្ឋ ក្រោយរកឃើញថា លោកបានប្រព្រឹត្តអំពើពុករលួយ។
សូមបញ្ជាក់ថា លោក គ្រុយ លឹមហេង ត្រូវបានអង្គភាពប្រឆាំងអំពើពុករលួយធ្វើការឃាត់ខ្លួនកាលពីអំឡុងចុងឆ្នាំ២០១៩ បន្ទាប់ពីបានស្រាវជ្រាវ និងស៊ើបអង្កេតរកឃើញថា អតីតអគ្គកុងស៊ុលរូបនេះបានប្រព្រឹត្តអំពើពុករលួយ តាមរយៈការបោះត្រា យកលុយពីពលរដ្ឋដោយខុសច្បាប់ ក្នុងអំឡុងឆ្នាំ២០១៦ ដល់ខែមិថុនា ឆ្នាំ២០១៨។
ក្រោយមកតុលាការក៏បានចេញឃុំដីកាបង្គាប់ឲ្យឃុំខ្លួនរូបលោក ក្រោមបទចោទប្រកាន់ចំនួន៤ រួមមាន៖ ១.បទបំផ្លាញដោយចេតនា និងគៃបំបាត់ដោយទុច្ចរិត, ២. បទរំលោភអំណាច, ៣. បទវីតិក្រម (យកលុយលើសការកំណត់) និង៤. បទមិនប្រកាសទ្រព្យសម្បត្តិ និងបំណុល (ចាប់តាំងពីឆ្នាំ២០១៥ ដល់២០១៩)៕
