(ភ្នំពេញ)៖ រដ្ឋបាលរាជធានីភ្នំពេញនៅថ្ងៃនេះ បានសម្តែងនូវការសោកស្តាយចំពោះកម្មករក្រុមហ៊ុនស៊ិនទ្រីដែលបន្តធ្វើកូដកម្មមិនព្រមចេញមកប្រមូលសំរាម ខណៈអាជ្ញាធរ រួមជាមួយតំណាងក្រុមហ៊ុន និងតំណាងកម្មករបានដោះស្រាយគ្នា ហើយយល់ព្រមធ្វើការប្រមូលសំរាមកាលពីល្ងាចថ្ងៃទី៧ តុលា ហើយនោះ។
កម្មករប្រមូលសំរាមបន្តធ្វើកូដកម្ម
រដ្ឋបាលរាជធានីភ្នំពេញបានលើកឡើងថា ខ្លួនសោកស្តាយចំពោះទង្វើរបស់កម្មករនិយោជិតរបស់ក្រុមហ៊ុនស៊ិនទ្រីមួយចំនួនដែលមិនបានគោរពតាមការព្រមព្រៀង ដូចដែលមានចែងក្នុងកំណត់ហេតុអង្គប្រជុំ។
យ៉ាងណាក៏ដោយ រដ្ឋបាលរាជធានីភ្នំពេញបានបញ្ជាក់ថា ដើម្បីដោះស្រាយបញ្ហានេះ ខ្លួនកំពុងចាត់វិធានការដោយប្រើប្រាស់កម្លាំងសរុប និងមធ្យោបាយសរុប ដើម្បីប្រមូលសំរាមដែលមានការកកស្ទះនៅរាជធានីភ្នំពេញឲ្យអស់ក្នុងរយៈពេលដ៏ខ្លីខាងមុខនេះ។
អាជ្ញាធរសម្រេចធ្វើការប្រមូលសំរាមដោយខ្លួនឯង
សូមបញ្ជាក់ថា កម្មករក្រុមហ៊ុនស៊ិនទ្រីបានធ្វើកូដកម្មមិនប្រមូលសំរាមចាប់តាំងពីថ្ងៃសៅរ៍មកម្ល៉េះ ហើយកាលពីថ្ងៃម្សិលមិញនេះ លោក ឃួង ស្រេង អភិបាលរាជធានីភ្នំពេញ បានចុះទៅអន្តរាគមន៍ធ្វើការដោះស្រាយដោយផ្ទាល់ជាមួយក្រុមកម្មករទាំងនោះ ហើយក៏មានការសន្យាថា ក្រុមកម្មករនឹងចេញប្រមូលសំរាមវិញនៅល្ងាចថ្ងៃដដែល ប៉ុន្តែមកទល់នឹងព្រឹកថ្ងៃព្រហស្បត្តិ៍នេះ ក្រុមកម្មករបានផ្លាស់ប្តូរចិត្ត ហើយបន្តធ្វើកូដកម្មទៀត។
ក្រុមកម្មករដែលបន្តធ្វើកូដកម្មនោះបានលើកឡើងថា កាលជួបចរចាកាលពីថ្ងៃម្សិលមិញនេះ គឺនៅមិនទាន់ឈានដល់ចំណុចទាមទាររួមនៅឡើយទេ, ការទាមទារនោះ គឺក្រុមកម្មករ ចង់ឲ្យក្រុមហ៊ុនស៊ិនទ្រី ទូទាត់ប្រាក់អត្ថប្រយោជន៍ផ្សេងៗទាំងអស់ឲ្យបានរួចរាល់ ជាជាងការទូទាត់ជាដំណាក់កាល៕
