(ភ្នំពេញ)៖ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានមានប្រសាសន៍ថា ក្នុងនាមកងកម្លាំងនគរបាលជាតិ អគ្គស្នងការនគរបាលជាតិនឹងប្រើប្រាស់កម្លាំងប៉ូលិសអន្តរាគមន៍ទាំងអស់ សហការជាមួយកងរាជអាវុធហត្ថ ចេញប្រតិបត្តិការជួយលើការប្រមូល និងដឹកជញ្ជូនសំរាមទៅកាន់ទីលានចាក់សំរាម អំឡុងពេលដែលកម្មករប្រមូលសំរាមស៊ិនទ្រីបន្តធ្វើកូដកម្មនោះ។
ថ្លែងក្នុងពិធីសម្ភោធដាក់ឲ្យប្រើប្រាស់អគារអធិការរដ្ឋាននគរបាលខណ្ឌដូនពេញ នៅព្រឹកមិញ លោកនាយឧត្តមសេនីយ៍បានថ្លែងថា ក្នុងរយៈពេលប៉ុន្មានថ្ងៃនេះពោលគឺចាប់តាំងពីថ្ងៃទី០២ រហូតមកដល់ពេលនេះ បើទោះបីជា មានការខិតខំប្រឹងប្រែងប្រមូលដឹកជញ្ជូនសំរាមពីអាជ្ញាធរមូលដ្ឋាន ដែលមានប្រជាការពារសង្កាត់ ខណ្ឌ រាជធានី ចេញដឹកជញ្ជូនសំរាមទៅកាន់ទីលានចាក់សំរាមយ៉ាងណាក្តី តែការងារនេះមិនអាចធ្វើទាន់ពេលនោះទេ ដូច្នេះទេ យើងនឹងបញ្ជូនកម្លាំងនគរបាលជាតិផ្នែកអន្តរាគមន៍សហការជាមួយកម្លាំងកងរាជអាវុធហត្ថដើម្បីជួយដឹកជញ្ជូននិងប្រមូលសំរាមឱ្យទាន់ពេលវេលា។
គួរបញ្ជាក់ថា ចាប់តាំងពីថ្ងៃសៅរ៍មកម្ល៉េះ កម្មករប្រមូលសំរាមក្រុមហ៊ុនស៊ិនទ្រីបានធ្វើកូដកម្មមិនចេញប្រមូលសំរាមឡើយ ដោយពួកគេទាមទារនូវលក្ខខណ្ឌមួយចំនួន៕
