(កែប)៖ បើតាមប្រជាពលរដ្ឋបានឲ្យដឹងថា កាលពីថ្ងៃទី១៥ ខែតុលា ឆ្នាំ២០២០កន្លងទៅថ្មីៗនេះ ក្រុមប្រឹក្សាឃុំអង្កោល ដែលគេដឹងថា មានឈ្មោះ គង់ យន្ត បានបញ្ជាឲ្យគ្រឿងចក្រឈូសឆាយ និងដឹកដីចាក់លុបសមុទ្រ ត្រង់ចំណុចភូមិអំពែង ឃុំអង្កោល ស្រុកដំណាក់ចង្អើរ ខណៈដែលលោកមេឃុំចេញទៅព្យាបាលជំងឺ។
ប្រជាពលរដ្ឋបានលើកឡើងថា ប្រសិនបើជាពួកគាត់ប្រជាពលរដ្ឋសាងសង់តូប ឬក៏ធ្វើអ្វីមួយនៅមាត់សមុទ្រ គឺត្រូវតែសុំច្បាប់ ឬសុំច្បាប់ហើយ គេមិនអនុញ្ញាតផង ចុះហេតុអ្វីបានជាលោកក្រុមប្រឹក្សាឃុំម្នាក់នេះ ហ៊ានដល់ចាក់ដីលុបសមុទ្រ ដោយមិនមានអ្នកណាមកហាមឃាត់សោះ ឬមួយច្បាប់គេអនុវត្តតែជាមួយប្រជាពលរដ្ឋតូចតាចទេ។
ចំពោះករណីនេះ លោក មុី ជី មេឃុំអង្កោលបានឲ្យដឹងថា មួយរយៈនេះរូបលោកមានជំងឺ ហើយបានប្រគល់ការងារឲ្យទៅជំទុកទី១ ហើយរឿងលោកក្រុមប្រឹក្សាឃុំចាក់ដីលុបសមុទ្រនោះ លោកមិនគាំទ្រនោះទេ ដែលក្នុងនាម ខ្លួនគឺជាមន្ត្រី ធ្វើអ្វីតាមតែទំនើងចិត្ត ធ្វើឲ្យប៉ះពាល់ដល់អារម្មណ៍របស់ប្រជាពលរដ្ឋ និងជាគំរូអាក្រក់មួយ ដែលមិនអាចទទួលយកបាន។
ចំណែកលោកស្រី គឹម ចាន្នី អភិបាលស្រុកដំណាក់ចង្អើរបានថ្លែងថា ពេលនេះ លោកស្រីបានបញ្ជាគ្រឿងចក្រកាយចេញដីនោះចេញវិញហើយ៕
