(មណ្ឌលគិរី)៖ ស្ត្រីម្នាក់ដែលបានបញ្ជាក់ថា មានឈ្មោះ សាយ ស្រីដាវ អាយុ២៨ឆ្នាំ រស់នៅភូមិស្រែសង្គមស្រុកកោះញ៉ែក ខេត្តមណ្ឌលគិរី បានដាក់ពាក្យប្តឹងទៅព្រះរាជអាជ្ញា ដោយប្តឹងទៅលើមន្រ្តីឧទ្យានុរក្សដេអេ ថា បានប្រើហិង្សាលើរូបនាងបណ្តាលឲ្យមានរបួស។
បណ្តឹងបានប្តឹងដោយផ្ទាល់ទៅលើឈ្មោះ ឆាយ ផាន់ណា មន្ត្រីឧទ្យានុរក្សដេអេ រួមទាំងបក្ខពួកម្នាក់ទៀតឈ្មោះ លីន ដែលជាមន្ត្រីបរិស្ថានដេអេ។
ស្រ្តីរងគ្រោះ និងមន្រ្តីបរិស្ថានដែលរងបណ្តឹង (រូប៖ សហការី)
ពាក្យបណ្តឹងបានបញ្ជាក់ថា កាលពីរវេលាម៉ោង៣ទៀបភ្លឺថ្ងៃទី២០ ខែតុលា ឆ្នាំ២០២០ រថយន្ដរបស់នាងបានដឹកទ្វាមកពីស្រុកកោះញ៉ែក លុះមកដល់ចំណុចកើតហេតុស្ថិតនៅភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ក៏បានជួបនឹងមន្ត្រីបរិស្ថានរូបនោះដែលបានមកចាប់ឃាត់រថយន្តរបស់នាង ហើយក៏បានប្រតាយប្រតប់វ៉ៃនាងត្រូវជាច្រើកន្លែង បណ្ដាលឲ្យរងរបួសបែកក្បាល បែកមាត់ និងដងខ្លួនជាច្រើនកន្លែងទៀត។
យ៉ាងណាក៏ដោយចំពោះករណីនេះ លោក កែវ សុភ៌គ ប្រធានមន្ទីរបរិស្ថានខេត្តមណ្ឌលគិរី បានថ្លែងថា រឿងនេះ បើតាមមន្រ្តីរបស់លោករាយការណ៍ គឺនៅពេលដែលក្រុមមន្រ្តីចុះចាប់ ស្រ្តីរូបនោះបានរត់ទៅបុកនឹងសរសរដោយខ្លួនឯង ហើយថា ករណីនេះគឺមានមន្រ្តីប៉ុស្តិ៍ចុះសហការដែរនៅពេលនោះ៕
