(តាកែវ)៖ ក្នុងរយៈពេលប៉ុន្មានថ្ងៃនេះ មានបងប្អូនប្រជាពលរដ្ឋរស់នៅក្នុងក្រុងដូនកែវមួយចំនួនធំបានសម្តែងនូវការមិនសប្បាយចិត្ត ក្រោយពីទឹកស្អាតដែលពួកគាត់ប្រើប្រាស់រាល់ថ្ងៃ ប្រែទៅជាកង្វក់ក្លាយទៅជាទឹកភក់មិនអាចប្រើប្រាស់បាន។
ប្រជាពលរដ្ឋម្នាក់បានលើកឡើងពីកង្វល់នេះនៅលើបណ្តាញសង្គមថា «ក្នុងនាមអតិថិជនសូមអង្វរដល់ម្ចាស់ក្រុមហ៊ុនមេត្តាមើលទឹកដែលខ្លួនចែកចាយផង… ទឹកស្អាតរបស់លោកបានប្តូរពណ៌ខោអាវរបស់ក្រុមគ្រួសារខ្ញុំអស់ជាង១០កំប្លេហើយ តើអ្នកណាជាអ្នកទទួលខុសត្រូវ ?»។
ចំពោះករណីនេះ លោក កេត ព្រុង ប្រធានមន្ទីរ ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តតាកែវ បានថ្លែងថា ទឹកស្អាតក្នុងទីរួមខេត្តតាកែវប៉ុន្មានថ្ងៃនេះពិតជាល្អក់កករប្រើប្រាស់មិនកើតមែន ហើយលោកក៏បានរាយការណ៍ និងអន្តរាគមន៍ដែរ ហើយបានរកឃើញថា មានការកាយដីដាច់ទុយោទឹក ប៉ុន្តែបញ្ហានេះត្រូវបានដោះស្រាយ ហើយទឹកក៏បានប្រែត្រឡប់មកធម្មតាវិញដែរ តែប្រសិនបើតំបន់ណានៅជួបបញ្ហានេះ សូមរាយការណ៍មកលោក៕
