កាលពីរសៀលថ្ងៃទី២៧ ខែតុលា ឆ្នាំ២០២០ អាជ្ញាធរខណ្ឌច្បារអំពៅ បានបញ្ជាឲ្យផ្អាកជាបន្ទាន់នូវសកម្មភាពហ៊ុមព័ទ្ធរបងខុសច្បាប់ ដើម្បីយកច្រាំងទន្លេមេគង្គធ្វើជាកម្មសិទ្ធិ នៅចំណុចភូមិក្បាលជ្រោយ សង្កាត់ព្រែកឯង ក្បែរកោះនរា។
សកម្មភាពហ៊ុំព័ទ្ធរបងនេះ បានធ្វើឡើងនៅលើច្រាំងទន្លេមេគង្គប្រមាណ២០០ម៉ែត្រ ដែលករណីនេះ អ្នកភូមិបានប្តឹងចោទថា ជាការបំពានយកដោយខុសច្បាប់។
របាយការណ៍របស់មន្ត្រីសាលាខណ្ឌច្បារអំពៅ បានឲ្យដឹងថា ករណីសាងសង់របងដែកនេះ គឺមិនទាន់មានលិខិតអនុញ្ញាតសាងសង់ពីសមត្ថកិច្ចជំនាញទេ, ដូច្នេះក្រុមការងារក៏សម្រេចឲ្យម្ចាស់របងផ្អាកការសាងសង់របងជាបណ្តោះអាសន្ន រង់ចាំការដោះស្រាយទំនាស់ជាមុនសិន។
យ៉ាងណាក៏ដោយ បើតាមការលើកឡើងរបស់ប្រជាពលរដ្ឋថា ម្ចាស់សំណង់របងខុសច្បាប់នេះ គឺមានឈ្មោះ លឹម វុទ្ធី ជាតំណាង ហើយករណីសាងសង់របងនេះព័ទ្ធយកច្រាំងទន្លេនេះ អាជ្ញាធរខណ្ឌច្បារអំពៅធ្លាប់បានហាមឃាត់ និងឲ្យរុះរើបង្គោលរបងជាច្រើនសារហើយ តែគេមិនព្រមរើ៕