ក្រោយពីបានប្រកាសពីយុទ្ធនាការ «១ដុល្លារសម្រាប់កុមារកម្ពុជា ឬ 1 Dollar Challenge for Cambodia Children» គិតត្រឹមរយៈពេល២៤ម៉ោង មានប្រាក់ចំនួនជាង ១៣ម៉ឺនដុល្លារ ត្រូវបានប្រើប្រាស់បណ្តាញសង្គមផ្ទេរទៅកាន់គណនីមន្ទីរពេទ្យកុមារអង្គរ។
សាយ ដែលជាស្ថាបនិកក្នុងការរ៉ៃអង្គាសនេះ និងកំពុងតែរត់បន្តពីខេត្តបាត់ដំបង ទៅកាន់ខេត្តប៉ៃលិន ក្នុងដំណើរបេសកកម្ម «រត់ដើម្បីមនុស្សធម៌ជាមួយសាយ» បានថ្លែងថា ខ្លួនរំភើបណាស់បន្ទាប់ពីទទួលបានព័ត៌មានពីខាងមន្ទីរពេទ្យ ហើយខ្លួនរំពឹងថា Challenge ១ដុល្លារនេះ មិនត្រឹមតែអាចជួយដល់មន្ទីរពេទ្យកុមារអង្គរ ក្នុងដំណើរកម្មវិធីរត់របស់លោកប៉ុណ្ណោះទេ ប៉ុន្តែទោះជារយៈពេល ៩៩ថ្ងៃ នៃការរត់របស់លោកបានបញ្ចប់ក៏ដោយ Challenge ១ដុល្លារ ដែលមានការជួយពីសំណាក់បងប្អូនប្រជាជនទាំងអស់ ក៏នៅតែបន្តជួយដល់មន្ទីរពេទ្យរហូតទៀតផង…»។
សូមបញ្ជាក់ថា ថវិកាដែលទទួលបានពី «១ដុល្លារសម្រាប់កុមារកម្ពុជា ឬ 1 Dollar Challenge for Cambodia Children» របស់អ្នកប្រើប្រាស់បណ្តាញសង្គមហ្វេសប៊ុក គិតត្រឹមម៉ោង៤រសៀលថ្ងៃទី១២ ខែវិច្ឆិកា ទទួលបានចំនួនប្រមាណ ៥៤១លានរៀល (១៣,២ម៉ឺនដុល្លារ) ហើយបើគិតចំនួនសរុបទាំងអស់ថវិកាទទួលបានប្រមាណ ៧៥១លានរៀល (១៨,៣ម៉ឺនដុល្លារ) ខណៈគោលដៅរបស់ សាយ គឺត្រូវការ ១ពាន់លានរៀល៕
