ព្រះសីហនុ – តាមរបាយការណ៍របស់សាខាពន្ធដារខេត្តព្រះសីហនុបានឲ្យដឹងថា ក្នុងឆ្នាំ២០២០នេះ មានយានយន្តចំនួន ១៦ ២៥០ គ្រឿងបានចូលមកបង់ពន្ធ ដោយទទួលបានប្រាក់ពន្ធសរុបចំនួន ៨ ៨៩៦ ៥១០ ០០០៛ ដែលចំនួនឃើញថា មានការកើនឡើង ២៥% បើធៀបនឹងឆ្នាំ២០១៩។
លោក សន ស៊ីផល ប្រធានសាខាពន្ធដារខេត្តព្រះសីហនុបានថ្លែងថា ការកើនឡើងនូវចំណូលពន្ធនេះ គឺបញ្ជាក់ឲ្យឃើញថា បងប្អូនម្ចាស់មធ្យោបាយទាំងអស់គាត់មានការភ្ញាក់រលឹកមកបង់ពន្ធទាន់ពេលវេលា។
លោកប្រធានសាខាពន្ធដារបានបន្តទៀតថា ជាទូទៅក្រោយការបញ្ចប់នូវការបង់ពន្ធប្រចាំឆ្នាំជារៀងរាល់ឆ្នាំខាងសាខាពន្ធដារខេត្តព្រះសីហនុតែងតែមានការពិន័យទៅលើយានជំនិះគ្រប់ប្រភេទដែលមិនបានចូលរួមក្នុងការបង់ពន្ធដើម្បីជាការឆ្លុះបញ្ចាំងពីលទ្ធផលកន្លងមកថា តើការចូលប្រកាសបង់ពន្ធនាឆ្នាំកន្លងមករបស់អស់លោក លោកស្រីដែលជាម្ចាស់យានយន្តមានការរីកចម្រើនឬមានការថយចុះ។ ហើយដើម្បីជាលទ្ធផលឆ្លុះបញ្ចាំងនៃលទ្ធផលនេះខាងក្រុមការងារសាខាពន្ធដារខេត្តព្រះសីហនុត្រូវតែមានយុទ្ធនាការមួយក្នុងការត្រួតពិនិត្យ នឹងធ្វើការពិន័យ។
ជាមួយគ្នានេះដែរ លោក សន ស៊ីផល ប្រធានសាខាពន្ធដារខេត្តព្រះសីហនុបានថ្លែងអំណរគុណចំពោះបងប្អូនប្រជាពលរដ្ឋចូលរួមសហការនិងយល់ដឹងអំពីការបង់ពន្ធចូលរដ្ឋ, ហើយលោកសង្ឃឹមថា ក្នុងឆ្នាំ២០២១ខាងមុខនេះនឹងមានការកើនឡើងនៃការបង់ពន្ធមធ្យោបាយដឹកជញ្ជូននិងយានជំនិះគ្រប់ប្រភេទ៕