ភ្នំពេញ – ក្នុងជំនួបជាមួយអភិបាលរាជធានីភ្នំពេញកាលពីរសៀលថ្ងៃទី២០ ខែមករា ឆ្នាំ២០២១ លោក អាណាតូលី បូរ៉ូវីគ ឯកអគ្គរដ្ឋទូតថ្មីរបស់ប្រទេសរុស្ស៊ី ប្រចាំប្រទេសកម្ពុជាបានបញ្ជាក់ថា ប្រទេសរុស្ស៊ីគ្រោងនឹងបញ្ជូនវ៉ាក់សាំងការពារជំងឺកូវីដ១៩ Sputnik V មកឲ្យកម្ពុជាក្នុងពេលឆាប់ៗនេះ។
ជំនួបរវាងឯកអគ្គរដ្ឋទូតរុស្ស៊ីថ្មី និងអភិបាលរាជធានីភ្នំពេញ
លោក បូរ៉ូវីគ បានបញ្ជាក់ថា វ៉ាក់សាំង Sputnik V ត្រូវបានផលិតដោយប្រទេសរុស្ស៊ីដើម្បីប្រឆាំងនឹងជំងឺកូវីដ១៩ ហើយរុស្ស៊ីគ្រោងនឹងបញ្ជូនមកឲ្យប្រទេសកម្ពុជា បន្ទាប់ពីពិភាក្សាជាមួយក្រសួងសុខាភិបាលកម្ពុជា។
សូមបញ្ជាក់ថា វ៉ាក់សាំង Sputnik V ត្រូវបានគេចាក់ឲ្យពលរដ្ឋនៅប្រទេសរុស្ស៊ីរួចហើយ ដោយវាតម្រូវឲ្យចាក់ពីរដង និងត្រូវរកឃើញថា វាមានប្រសិទ្ធភាព ៩២ ភាគរយ ហើយគេអាចរក្សាទុកវាក្នុងសីតុណ្ហភាព ទូទឹកកក ធម្មតាបាន៕
