តាកែវ – ប្រជាពលរដ្ឋជាច្រើនគ្រួសាររស់នៅក្នុងភូមិត្រពាំងខ្លូត ឃុំត្រាំកក់ ស្រុកត្រាំកក់ បាននិយាយថា ពួកគាត់បានដាក់ពាក្យបណ្តឹងទៅកាន់អាជ្ញាធរឃុំ ក៏ដូចជាស្រុកអស់រាប់ឆ្នាំហើយ ដោយទាមទារឲ្យលោកមេភូមិដែលមានដីជាប់ផ្លូវ យល់ព្រមបើកផ្លូវឲ្យទូលាយទៅតាមប្លង់របស់សូរិយោដីដែលមានទំហំ ៣ម៉ែត្រ ប៉ុន្តែបណ្តឹងនោះហាក់គ្មានការអើពើឡើយ។
ពលរដ្ឋថា លោក ឈុត សារី មេភូមិត្រពាំងខ្លូត គាត់មានដីនៅជាប់នឹងផ្លូវ ប៉ុន្តែផ្លូវនេះតូចចង្អៀតដោយធ្វើដំណើរបានតែថ្មើជើងប៉ុណ្ណោះ ប៉ុន្តែនៅក្នុងប្លង់របស់សុរិយោដីបានបង្ហាញថា ផ្លូវនោះមានទំហំទទឹង៣ម៉ែត្រ ទើបពួកគាត់ស្នើឲ្យមានការបើកផ្លូវឲ្យធំដើម្បីងាយស្រួលក្នុងធ្វើដំណើរ ប៉ុន្តែលោកមេភូមិមិនយល់ព្រមនោះឡើយ ហើយតែងតែរករឿងប្រជាពលរដ្ឋដែលមានដីនៅខាងក្នុងថែមទៀត។ ពេលខ្លះគាត់តែងរើសធាងត្នោត ឬមែកឈើយកមកដាក់បិទផ្លូវដើម្បីកុំឲ្យប្រជាពលរដ្ឋធ្វើដំណើរបាន។
ករណីនេះ ប្រជាពលរដ្ឋបានដាក់ពាក្យបណ្តឹងទៅកាន់អាជ្ញាធរឃុំ និងស្រុកអស់រយៈពេលប្រមាណ ៦ឆ្នាំមកហើយ ប៉ុន្តែពុំឃើញមានដំណោះស្រាយណាមួយឡើយ។
លោក សោម សារត្ន័ មេឃុំត្រាំកក់បានថ្លែងថា ករណីនេះ លោកបានទទួលពាក្យបណ្ដឹងពីពលរដ្ឋយូរហើយ, ហើយលោកក៏តែងព្យាយាមសម្របសម្រួលជាច្រើនលើកច្រើនសារដែរ ថែមទាំងបានហៅលោកមេភូមិមកជួប និងណែនាំគាត់ឲ្យបើកចិត្តទូលាយយល់ព្រមបើកផ្លូវឲ្យប្រជាពលរដ្ឋទៅតាមប័ណ្ណកម្មសិទ្ធដែលចេញដោយមន្ទីរជំនាញទៀតផង។
តែយ៉ាងណា ជានីតិវិធីបន្តទៀត លោកនឹងងហៅលោកមេភូមិត្រពាំងខ្លូតមកនិយាយគ្នាម្ដងទៀត ដើម្បីធ្វើការផ្សះផ្សារគ្នា៕