បន្ទាយមានជ័យ – រដ្ឋបាលខេត្តបន្ទាយមានជ័យបានប្រកាសនៅព្រឹកថ្ងៃទី១៣ ខែកុម្ភៈ ឆ្នាំ២០២១នេះថា បុរសខ្មែរដែលបានវិលត្រឡប់មកពីប្រទេសថៃតាមច្រកអូរបីជាន់ និងបានស្លាប់កាលពីល្ងាចថ្ងៃទី១២ កុម្ភៈ ម្សិលមិញ មិនមែនស្លាប់ដោយសារជំងឺកូវីដ១៩ទេ តែគាត់ស្លាប់ដោយសារជំងឺមហារីកថ្លើមដំណាក់កាលចុងក្រោយ។
តាមរដ្ឋបាលខេត្តបន្ទាយមានជ័យថា បុរសរូបនោះមានអាយុ៣៨ឆ្នាំ មានទីលំនៅភូមិតាមាឃ ឃុំគោកឃ្មុំ ស្រុកថ្មគោល ខេត្តបាត់ដំបង បានមកដល់ប្រទេសកម្ពុជាតាមច្រកអូរបីជាន់ នៅវេលាម៉ោង២រសៀល ថ្ងៃទី១២ ខែកុម្ភៈ ឆ្នាំ២០២១ ដោយមានអាការៈហត់ និងពិបាកដកដង្ហើម មានស្បែកឡើងលឿងខ្លាំង ហើយបន្ទាប់មកក៏ត្រូវបានបញ្ជូនទៅកាន់មន្ទីរពេទ្យមិត្តភាពកម្ពុជា-ជប៉ុន មង្គលបូរី ដោយរថយន្តសង្រ្គោះបន្ទាន់។
នៅពេលដែលអ្នកជំងឺទៅដល់មន្ទីរពេទ្យ គឺមានសភាពធ្ងន់ធ្ងរ ភ្លាមៗនោះក្រុមគ្រូពេទ្យបានធ្វើការជួយសង្រ្គោះជាបន្ទាន់ តែសភាពអ្នកជំងឺកាន់តែធ្ងន់ធ្ងរទៅជាលំដាប់ ហើយក៏បានទទួលមរណភាពនៅវេលាម៉ោង ៦ល្ងាច ថ្ងៃទី១២ ខែកុម្ភៈ ឆ្នាំ២០២១។
យោងតាមការពិនិត្យទៅលើសំណុំឯកសារនៃការព្យាបាលនៅប្រទេសថៃដែលជាប់មកជាមួយអ្នកជំងឺបានឃើញថា គាត់មានបញ្ហាសុខភាពដូចជា ជំងឺមហារីកថ្លើមដំណាក់កាលចុងក្រោយ និងរាលដាលទៅឆ្អឺងនិងសួត៕