ករណីសាងសង់ឃ្លាំងដ៏ធំមួយកន្លែងស្ថិតនៅភូមិតាឌូ សង្កាត់រការក្រៅ ក្រុងដូនកែវ ដែលម្ចាស់សាងសង់ជិតរួចរាល់ទៅហើយ ទើបមន្រ្តីភូមិបាលចុះទៅហាមឃាត់ និងថាអត់ច្បាប់នោះ ឥឡូវនេះប្រធានមន្ទីរសុរិយោដីខេត្តតាកែវ បញ្ជាក់ហើយថា មន្ទីរធ្លាប់បានចេញលិខិតឲ្យផ្អាកតាំងតែពីខែកុម្ភៈមកម្ល៉េះ តែម្ចាស់សំណង់មិនស្តាប់។
លោក នួន សុធា ប្រធានមន្ទីរសុរិយោដី សំណង់ និងនគរូបនីយកម្មខេត្តតាកែវ បានមានប្រសាសន៍ថា ករណីសំណង់ឃ្លាំងដ៏ធំនេះ គឺពុំមានច្បាប់អនុញ្ញាតឲ្យធ្វើការសាងសង់ទេ ហើយកាលពីដើមខែកុម្ភៈ ខាងមន្ទីរ ក៏ដូចជាខាងភូមិបាលក្រុងដូនកែវ បានចេញលិខិតឲ្យផ្អាកការសាងសង់នោះ ប៉ុន្តែម្ចាស់សំណង់នេះមិនបានស្តាប់តាមឡើយ ហើយនៅតែបន្តសាងសង់ទៀត។
យ៉ាងណាក៏ដោយ ករណីនេះ លោកទុកឲ្យអាជ្ញាធរជាអ្នកមានវិធានការ ព្រោះសំណង់នេះពុំមានច្បាប់សាងសង់ទេ។
បើតាមការលើកឡើងរបស់លោក សាង មករា ដែលជាម្ចាស់ឃ្លាំងនោះថា ខ្លួនបានពឹងឲ្យមន្រ្តីម្នាក់ជាអ្នករត់ច្បាប់សាងសង់ឃ្លាំងនោះ ដោយបានចំណាយលុយជាបន្តបន្ទាប់ ហើយមន្រ្តីនោះបានឲ្យខ្លួនសាងសង់សិនទៅ លុះដល់ថ្ងៃទី២៣ ខែមេសា ឆ្នាំ២០២១ ក៏មានក្រុមមន្រ្តីការិយាល័យភូមិបាលក្រុងដូនកែវ ចុះមកឲ្យលោកផ្អាកការសាងសង់ ហើយប្រាប់ឲ្យលោកយកលុយប្រមាណ៦ពាន់ដុល្លារ ទៅរត់ច្បាប់ ទើបអាចសាងសង់បន្តបាន៕