(តាកែវ) - ខ្លាញ់គោកែឆ្នៃរួច ដែលត្រូវគេដឹកតាមរថយន្តយីឌុបមួយគ្រឿង ពីរាជធានីភ្នំពេញ ប្រុងយកទៅកាន់ប្រទេសវៀតណាម ត្រូវបានក្រុមមន្ត្រីជំនាញ នៃការិយាល័យបសុព្យាបាលខេត្តតាកែវធ្វេីការឃាត់ទុក ដោយសារតែពុំមានច្បាប់អនុញ្ញាត។
តាមមន្ត្រីផលិតកម្ម និងបសុព្យាបាលខេត្តតាកែវបានឲ្យដឹងថា ការឃាត់រថយន្តខាងលេីនេះធ្វេីឡេីងកាលពីយប់ថ្ងៃទី០៩ ខែឧសភា ឆ្នាំ២០២១ នៅចំណុចច្រករបៀងឫស្សី៣គុម្ភ ក្នុងទឹកដីស្រុកគីរីវង់ ខេត្តតាកែវ ជាប់ព្រំប្រទល់ប្រទេសវៀតណាម។
បើតាមមន្ត្រីដដែលនេះថា ខ្លាញ់គោដែលកែឆ្នែរួចទាំងអស់គឺមិនមានសារធាតុគីមីប៉ះពាល់សុខភាព តែដែលឃាត់ទុកនេះ គឺក្នុងគោលបំណងឲ្យម្ចាស់ទៅរត់ការសុំច្បាប់អនុញ្ញាតិត្រឹមត្រូវពីមន្ត្រីជំនាញពាក់ព័ន្ធ ព្រោះតាមការពិនិត្យជាក់ស្តែងគឺពុំមានច្បាប់អ្វីទាំងអស់។
គិតមកដល់ព្រឹកថ្ងៃទី១២ ខែឧសភា ឆ្នាំ២០២១នេះ គេនៅមិនទាន់អនុញ្ញាតិឲ្យនាំចេញខ្លាញ់គោនោះទៅលក់នៅឡើយទេ បន្ទាប់ពីឃាត់ទុករយៈពេល៣ថ្ងៃមកហេីយ៕
