(តាកែវ) – ប្រជាពលរដ្ឋរស់នៅក្នុងឃុំកំពង់រាប នៃស្រុកព្រៃកប្បាស បានថ្លែងថា ខណៈដែលជំងឺកូវីដ១៩កំពុងរាតត្បាត ដែលតម្រូវឲ្យគ្រប់គ្នាត្រូវអនុវត្តវិធានការ ៣កុំ ៣ការពារ ស្រាប់តែនៅក្នុងមូលដ្ឋានឃុំនេះ បែរជាមាននូវការប្រមូលផ្តុំគ្នាលេងល្បែងយ៉ាងអនាធិបតេយ្យ ក្រោមការអនុញ្ញាតរបស់លោកមេឃុំទៅវិញ។
ល្បែងស៊ីសងកំពុងមានពាសពេញឃុំកំពង់រាប
បើតាមពលរដ្ឋថា នៅក្នុងឃុំកំពង់រាបនេះ បើគេចង់លេងបៀរ គឺគេអាចទៅប្រមូលផ្តុំគ្នាលេងនៅផ្ទះកូនប្រសាមេភូមិកញ្ចិល ដែលនៅទីនោះគេលេងជារៀងរាល់ថ្ងៃ ព្រោះថា ម្ចាស់ផ្ទះគេអាងឪគេជាមេភូមិស្រាប់ ចឹងហើយគេបើកលេងគ្មានអ្នកណាហ៊ានចុះមកបង្ក្រាបឡើយ។
ទីតាំងមួយទៀត គឺគេលេងនៅរោងជាប់មាត់ស្ទឹងក្នុងភូមិកំពង់រាប ដោយវង់នេះ គឺគេលេងស៊ីសងរាប់លានរៀល ហើយអ្នកបើកវង់បៀរនោះអះអាងថា គេបានសុំលោកមេឃុំរួចហើយ។
ហើយបើចង់លេងជល់មាន់វិញ គឺអាចទៅលេងនៅភូមិពាម, ទីនោះគេលេងរាល់ថ្ងៃ ដោយម្ចាស់សង្វៀនថា គេក៏បានសុំលោកមេឃុំរួចហើយ បើមិនអញ្ចឹងទេ គេមិនហ៊ានលេងទេ។
ចំពោះករណីនេះ យើងមិនអាចសុំការបំភ្លឺពីលោក សេង ម៉ៅ មេឃុំកំពង់រាប បានទេនៅថ្ងៃនេះ ដោយទូរស័ព្ទរបស់លោកមិនអាចទំនាក់ទំនងបាន។
យ៉ាងណាក៏ដោយ លោក ញ៉ែម ស្រស់ អភិបាលស្រុកព្រៃកប្បាសបានថ្លែងថា ករណីនេះ លោកនឹងបញ្ជាកម្លាំងឲ្យចុះទៅបង្ក្រាប ហើយថា នឹងកោះហៅលោក សេង ម៉ៅ មកបំភ្លឺចំពោះករណីអនុញ្ញាតឲ្យមានការបើកលេងល្បែងសុីសងខុសច្បាប់ ក្នុងសម័យកូវីដនេះ៕
