ក្រោយពីបានឃើញហ្វេសប៊ុករបស់បងប្អូនប្រជាពរដ្ឋដែលបានបង្ហោះរឿងសន្តិសុខ ផ្សារកំពង់ស្ពឺ បានទាត់កញ្ច្រែងក្មេងស្រីលក់ព្រីងម្នាក់ បណ្ដាលឲ្យកំពប់ទៅលើដី លោក វ៉ី សំណាង អភិបាលខេត្តកំពង់ស្ពឺ បានបង្ហាញអារម្មណ៍ រន្ធត់ និងសោកស្ដាយយ៉ាងខ្លាំង ចំពោះទង្វើអសីលធម៌បែបនេះ។
យ៉ាងណាក៏ដោយ ក្នុងនាមក្រុមប្រឹក្សាខេត្ត គណៈអភិបាលខេត្ត លោក វ៉ី សំណាង ក៏បានសូមអភ័យទោសចំពោះទង្វើដែលមិនគប្បីរបស់សន្តិសុខផ្សារកំពង់ស្ពឺ។
នៅថ្ងៃទី២០ ខែឧសភា នេះដែរ លោក វ៉ី សំណាង ក៏បានជួបផ្ទាល់ជាមួយក្មេងស្រីនោះ ហើយលោកក៏បានផ្តល់នូវសម្ភារៈមួយចំនួន សម្រាប់រួមចំណែកសម្រួលដល់ការលំបាករបស់គាត់កន្លងមក។
ជាមួយគ្នានេះ លោកអភិបាលខេត្ត ក៏បានសំណូមពរដល់បងប្អូនអាជីវករក៏ដូចជាប្រជាពលរដ្ឋទាំងអស់សូមមេត្តារក្សាឲ្យបាននូវសណ្ដាប់ធ្នាប់សាធារណៈដោយជៀសវាងគិតតែប្រយោជន៍ខ្លួន ភ្លេចអំពីផលប៉ះពាល់ដល់ប្រយោជន៍អ្នកដទៃ ដែលគាត់ត្រូវការប្រើប្រាស់ផ្លូវ។
បើទោះជាយ៉ាងណាក៏ដោយទង្វើអសីលធម៌របស់សន្តិសុខផ្សារកំពង់ស្ពឺនោះ លោក វ៉ី សំណាង បញ្ជាក់ថា ទង្វើបែបនេះ គឺមិនអាចលើកលែងបានឡើយ៕
