ក្រសួងសាធារណការ និងដឹកជញ្ជូនបានឲ្យដឹងថា នៅក្នុងខែឧសភាកន្លងទៅនេះ គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានចាប់រថយន្តដឹកជញ្ជូនលើសទម្ងន់ ១៧២គ្រឿង ដោយធ្វើការពិន័យបានថវិកាសរុបចំនួន ២៤២ លានរៀល ។
ចំនួននេះឃើញថា មានការកើនឡើង ៦ % បើធៀបនឹងទិន្នន័យ ខែមេសា ឆ្នាំ២០២១ កន្លងទៅ ដែលមានតែរថយន្តចំនួន ១៦១ គ្រឿងប៉ុណ្ណោះ។
ជាមួយគ្នានេះដែរ ក្រសួងសាធារណការ ក៏បានអំពាវនាវដល់ម្ចាស់រថយន្តដឹកទំនិញទាំងអស់ បញ្ឈប់ការដឹកលើសទម្ងន់ ព្រោះថា ការដឹកជញ្ជូនលើសទម្ងន់ គឺបានបំផ្លាញផ្លូវជាតិដែលនាំឱ្យខាតបង់ថវិកាជាតិ ព្រមទាំងបង្កនូវគ្រោះថ្នាក់ប៉ះពាល់ដល់ទ្រព្យសម្បត្តិសាធារណៈ និងជីវិតមនុស្សផងដែរ៕
