ភូមិស្វាយជ្រុំ និងភូមិអណ្តូង ស្ថិតនៅក្នុងឃុំបែកចាន ស្រុកអង្គស្នួល ត្រូវបានរដ្ឋបាលខេត្តកណ្តាល បញ្ចប់វិធានការកំណត់ជា «តំបន់លឿង» ហើយ ចាប់ពីថ្ងៃទី៥ ខែ មិថុនា ឆ្នាំ ២០២១ តទៅ បន្ទាប់ពីបានអនុវត្តរយៈ ពេល១សប្តាហ៍រួចមក។
ទន្ទឹមនឹងការបញ្ចប់វិធានការរដ្ឋបាលនេះ រដ្ឋបាលខេត្តកណ្តាលក៏បានណែនាំដល់រដ្ឋបាលស្រុកអង្គស្នួល ត្រូវសម្របសម្រួលរៀបចំថែរក្សាសណ្ដាប់ធ្នាប់ និងរបៀបរៀបរយសាធារណៈ និងសម្របសម្រួលលើកិច្ចការចាក់វ៉ាក់សាំងកូវីដ‑១៩ និងការផ្ដល់សេវាសុខាភិបាលទូទៅនិងអនុវត្តវិធានការរដ្ឋបាលដូចជាការយកសំណាក ការធ្វើចត្តាឡីស័ក ការព្យាបាលជំងឺកូវីដ‑១៩។
ជាមួយគ្នានេះដែរ ត្រូវផ្សព្វផ្សាយណែនាំដល់អាជីវករលក់ដូរនៅតាមផ្សារឬកន្លែងលក់ដូរទាំងអស់ត្រូវរៀបចំដាក់ខ្សែសុវត្ថិភាពដើម្បីរក្សាគម្លាតសុវត្ថិភាពបុគ្គលនិងរៀបចំអាកុល ជែលសម្រាប់អតិថិជនលាងដៃគ្រប់គ្នាៗនិងអនុវត្តតាមហ៊ានការពារផ្សេងនិងកំណត់គោលការណ៍ចាំបាច់ផ្សេងទៀតដើម្បីធានាប្រសិទ្ធភាពការងារទប់ស្កាត់និងប្រយុទ្ធប្រឆាំងការឆ្លងរាលដាលជំងឺកូវីដ‑១៩៕