វត្ថុបុរាណខ្មែរចំនួន ២៧រូប ដែលសមត្ថកិច្ចអាមេរិករឹបអូសបានពីបទកាន់កាប់វត្ថុបុរាណខុសច្បាប់នៅទីក្រុងញូវយ៉ក គ្រោងនឹងបញ្ជូនមកកាន់ប្រទេសកម្ពុជាវិញឆាប់ៗនេះ ក្រោយពីលោក ជុំ សុន្ទរី ឯកអគ្គរាជទូតកម្ពុជាប្រចាំសហរដ្ឋអាមេរិក និងលោក Cyrus vance Jr. រដ្ឋអាជ្ញានៃការិយាល័យរដ្ឋអាជ្ញាប្រចាំសង្កាត់ញូវយ៉ក បានចុះហត្ថលេខាលើកិច្ចព្រមព្រៀងផ្ទេរសិទ្ធ កាលពីថ្ងៃទី ០៩ ខែមិថុនា ឆ្នាំ២០២១។
លោក ជុំ សុន្ទរី បានថ្លែងថា ការបញ្ជូនត្រឡប់មកវិញនៃវត្ថុបុរាណទាំងនេះបានបង្ហាញឲ្យឃើញជាថ្មីនូវលទ្ធផលផ្លែផ្កានៃអនុស្សារណៈនៃការយោគយល់គ្នាចុះហត្ថ លេខាដោយរាជរដ្ឋាភិបាលកម្ពុជានិងរដ្ឋាភិបាលសហរដ្ឋអាមេរិកដែលបានបើកឡើងនូវទំព័រថ្មីនៃកិច្ចសហប្រតិបត្តិការទ្វេភាគីដ៏ល្អប្រសើរលើការអភិរក្សវប្បធម៌រវាង ប្រទេសទាំងពីរ។លោកសង្ឃឹមថាសហរដ្ឋអាមេរិកនឹងបន្តភាពជាដៃគូជាមួយប្រទេសកម្ពុជាដើម្បីយើងអាចបញ្ឈប់ការជួញដូរសម្បត្តិវប្បធម៌ខ្មែរខុសច្បាប់និងបញ្ជូន បេតិកភណ្ឌវប្បធម៌របស់ខ្មែរត្រឡប់ទៅកម្ពុជាវិញ។
ជាមួយគ្នានេះ លោកឯកអគ្គរាជទូតក៏បានអំពាវនាវនិងលើកទឹកចិត្តដល់អ្នកនិយមសន្សំវត្ថុបុរាណខ្មែរទាំងអស់ឱ្យពិនិត្យដោយយកចិត្តទុកដាក់នូវប្រភពដើមនៃវត្ថុបុរាណរបស់ខ្លួន និងសូមទទួលដឹងថា សម្បត្តិវប្បធម៌ខ្មែរភាគច្រើនដែលនៅក្រៅប្រទេសត្រូវបានយកចេញនិងជួញដូរដោយខុសច្បាប់ហើយគួរតែត្រូវបានប្រគល់ត្រឡប់មកកម្ពុជាវិញ។
លោកស្រី ភឿង សកុណា រដ្ឋមន្ត្រីវប្បធម៌និងវិចិត្រសិល្បៈ បានថ្លែងទៅកាន់ពិធីចុះហត្ថលេខានោះតាមរយៈប្រព័ន្ធវីដេអូ ដោយបានសម្តែងអំណរគុណ និង វាយតម្លៃខ្ពស់ចំពោះកិច្ចសហប្រតិ បត្តិការនិងការខិតខំប្រឹងប្រែងពីសំណាក់ការិយាល័យរដ្ឋអាជ្ញាសហរដ្ឋអាមេរិកប្រចាំសង្កាត់ញូវយ៉ក ក្រសួងសន្តិសុខមាតុភូមិសហរដ្ឋអាមេរិកស្ថានទូតសហរដ្ឋអាមេរិកប្រចាំកម្ពុជា និងស្ថានទូតកម្ពុជាប្រចាំសហរដ្ឋអាមេរិកព្រមទាំងក្រុមការងារនៃក្រសួងវប្បធម៌និងវិចិត្រសិល្បៈកម្ពុជាក្នុងការបញ្ជូនសម្បត្តិវប្បធម៌ទាំងនេះ ត្រឡប់មកមាតុភូមិកម្ពុជាវិញ។
សូមបញ្ជាក់ថា ក្នុងចំណោមវត្ថុបុរាណទាំងចំនួន២៧ ដែលត្រូវបានរកឃើញមកវិញដោយការិយាល័យរដ្ឋអាជ្ញានិងក្រសួងសន្តិសុខមាតុភូមិអាមេរិករួមមាន រូបបដិមាផ្នែកពុទ្ធសាសនា និងព្រហ្មញ្ញសាសនាសម័យអង្គរសំខាន់ៗមួយចំនួនដូចជា៖ ព្រះពុទ្ធគង់សមាធិលើនាគធ្វើពីសំរឹទ្ធ រូបព្រះឥសូរនិងព្រះនាងប្រាជ្ញាបារមិតាធ្វើពីថ្មភក់ជាដើម៕
