(សៀមរាប) – ក្រោយពីឃើញអាជ្ញាធរខេត្តកំពង់ស្ពឺ បានអនុវត្តការដកផ្លាកផ្សាយពាណិជ្ជកម្មស្រាបៀរ និងគ្រឿងស្រវឹង ចេញពីក្នុងភូមិសាស្រ្តខេត្តរបស់ខ្លួន ព្រោះតែខេត្តនេះ ជាខេត្តកំណើតរបស់សម្តេចសង្ឃ ជួន ណាត ជាអ្នកប្រាជ្ញរបស់ខ្មែរនោះ ងាកមកមើលពលរដ្ឋរស់នៅក្នុងខេត្តសៀមរាប ដែលជាខេត្តសំបូរដោយប្រាសាទបុរាណខ្មែរវិញ ពួកគាត់ ក៏ចង់ឲ្យអាជ្ញាធរធ្វើដូចគ្នានេះដែរ ប៉ុន្តែអាជ្ញាធរថា ផ្លាកផ្សាយពាណិជ្ជកម្មទាំងនោះមានច្បាប់ ហើយក៏គ្មានការហាមឃាត់ដែរ។
ប្រជាពលរដ្ឋរស់នៅក្នុងក្រុងសៀមរាបបានលើកឡើងថា គ្រាន់តែចូលមកដល់មាត់ច្រកក្រុងសៀមរាបភ្លាម ទេសចរនឹងឃើញផ្លាកផ្សាយពាណិជ្ជកម្មស្រាបៀយ៉ាងច្រើនស្កេកស្កះ នៅតាមដងផ្លូវ និងទ្រូងផ្លូវតែម្តង ខណៈដែលក្រុងសៀមរាបត្រូវបានចាត់ទុកថា គឺជាទីក្រុងបុរាណសំបូរទៅដោយប្រាងប្រាសាទ និងបង្ហាញអំពីវប្បធម៌ដ៏ផូផង់របស់ខ្មែរនោះ។
ជាមួយគ្នានេះដែរ ប្រជាពលរដ្ឋខ្លះទៀត ក៏បានបង្ហាញអំពីចម្ងល់របស់ខ្លួនដែរថា ក្នុងដំណាក់កាលដែលប្រទេសកម្ពុជាកំពុងជួបនូវវិបត្តិនៃការរាតត្បាតជំងឺកូវីដ១៩ ដោយក្នុងនោះដែរអាជ្ញាធរខេត្តសៀមរាប ក៏បានធ្វើការហាមប្រាមមិនឲ្យមានការជួបជុំផឹកស៊ី ប៉ុន្តែផ្លាកផ្សាយពាណិជ្ជកម្មស្រាបៀ បែរជាគេឃើញលើកនៅតាមដងផ្លូវ ក្នុងរដូវកូវីដនេះ ដែលហាក់ជួយជំរុញឲ្យមានការជួបជុំផឹកស៊ីយ៉ាងដូច្នោះដែរ។
យ៉ាងណាក៏ដោយ ចំពោះការលើកឡើងរបស់ប្រជាពលរដ្ឋទាំងនេះ លោក សុខ ថុល នាយករដ្ឋបាលខេត្តសៀមរាប បានថ្លែងថា ផ្ទាំងស្រាបៀរដែលគេលើកនៅតាមដងផ្លូវទាំងនោះ គឺគេគេមានច្បាប់ ហើយម្យ៉ាងការផ្សព្វផ្សាយស្រាបៀរ មិនត្រូវបានហាមឃាត់នោះឡើយ។ តែការជួបជុំផឹកស៊ី ពិតជាត្រូវហាមឃាត់ ដូច្នេះការផ្សព្វផ្សាយស្រាបៀរ គឺមិនពាក់ពន្ធ័នឹងការផឹកស្រាបៀរនោះឡើយ៕