(តាកែវ) – ប្រជាពលរដ្ឋរស់នៅក្នុងភូមិកំពង់ព្រះ ឃុំកំពង់រាប ស្រុកព្រៃកប្បាស នៅថ្ងៃនេះ បានស្នើដល់ស្ថាប័នពាក់ព័ន្ធ សូមមេត្តាអនុវត្តច្បាប់ឲ្យបានតឹងរឹងចំពោះប្រធានសហគមន៍នេសាទកំពង់រាប និងបក្ខពួក ដែលខ្លួនមានតួនាទីជាអ្នកអភិរក្សពូជត្រី តែបែរជានាំគ្នាយកអួនព័ទ្ធចាប់ត្រីក្នុងអន្លង់អភិរក្សទាំងនោះទៅវិញ។
ពួកគាត់ថា ក្រុមជនល្មើសដែលជាមេសហគមន៍នេសាទ និងឆ្មាំរបស់ខ្លួនសរុបចំនួន១១នាក់ ពេលនេះកំពុងតែស្ថិតនៅក្រៅសំណាញ់ច្បាប់នៅឡើយ ដោយគេពុំឃើញស្ថាប័នពាក់ព័ន្ធដូចជាជលផល ឬតុលាការ មានចំណាត់ការយ៉ាងណាចំពោះពួកគេ ខណៈដែលប្រជាពលរដ្ឋចាប់បានបទល្មើសរបស់ពួកគេនៅហ្នឹងមុខទៅហើយនោះ។
ក្រុមប្រជាពលរដ្ឋបានប្រដូចប្រធានសហគមន៍នេសាទកំពង់រាប និងឆ្មាំទាំងនោះ ដូចទៅហ្នឹងកណ្តុរដែលនៅក្នុងហិប សង្ងំកាត់បំផ្លាញទ្រព្យសម្បត្តិដូច្នោះដែរ ហើយពេលនេះប្រជាពលរដ្ឋចាប់បានកណ្តុរនោះទៅហើយ តើគួរត្រូវទុកឲ្យនៅកាត់បំផ្លាញទ្រព្យសម្បត្តិក្នុងហិបនោះទៀត ឬធ្វើយ៉ាងណា?
សូមបញ្ជាក់ថា កាលពីពេលថ្មីៗនេះ នៅចំណុចបឹងអភិរក្សត្រីពូជអន្លង់ចិន ស្ថិតក្នុងឃុំកំពង់រាប ស្រុកព្រៃកប្បាស គេបានឃើញក្រុមឆ្មាំអភិរក្សដែលមានគ្នាសរុបប្រមាណជា ១០នាក់ បាននាំគ្នាយកអួនទៅធ្វើការហ៊ុំព័ទ្ធចាប់ត្រី នៅក្នុងអន្លង់អភិរក្ស ដែលពេលនោះផ្តើមឲ្យប្រជាពលរដ្ឋរាប់សិបនាក់លើកគ្នាមកធ្វើការតវ៉ា។
ភ្លាមៗនោះដែរ គេឃើញអាជ្ញាធរស្រុកព្រៃកប្បាស ដឹកនាំដោយលោក កង វន្ថា អភិបាលរងស្រុកបាននាំកម្លាំងចុះទៅដល់ទីតាំង ហើយបានដកហូតយកសម្ភារៈល្មើស និងរកឃើញអ្នកប្រព្រឹត្តសរុបចំនួន១១នាក់ ក្នុងនោះមានទាំងអនុប្រធាន និងប្រធានសហគមន៍នេសាទកំពង់រាប ផងដែរ។
ក្នុងកំណត់ហេតុសាកសួរ លោក រស់ ប៉ុន អនុប្រធានសហគមន៍នេសាទកំពង់រាបបានថ្លែងថា លោកធ្វើតាមតែការបញ្ជាពីលោក អុិន ជឿន ជាប្រធានសហគមន៍ប៉ុណ្ណោះ ដោយថា លោក អុិន ជឿន ជាអ្នកបញ្ជាឲ្យលោកទៅជួលស្បៃអ៊ួនដើម្បីយកទៅហ៊ំពន្ធ័ចាប់ត្រីក្នុងអន្លង់ តែម្ចាស់អ៊ួនគេមិនព្រមជួលឲ្យទេ ទាល់តែប្រធានសហគមន៍ទៅជួលទើបគេព្រមជួលឲ្យ ព្រោះគេខ្លាចខុសច្បាប់ ហើយក្រោយមកលោក អុិន ជឿន ក៏ទៅជួលអ៊ួនដោយខ្លួនឯង និងបានឲ្យយកទៅក្រុមឆ្មាំប្រព្រឹត្តរាយព័ទ្ធចាប់ត្រីតែម្តង។
ជុំវិញករណីក្រុមឆ្មាំអភិរក្សពូជត្រី ហាមគេមិនឲ្យចាប់ត្រី រួចចាប់ខ្លួនឯងនេះ យើងមិនអាចសុំការបំភ្លឺពីលោក អុិន ជឿន ប្រធានសហគមន៍នេសាទកំពង់រាបបានទេនៅថ្ងៃនេះ។
យ៉ាងណាក៏ដោយ ក្រោយសាកសួរ និងរៀបចំសំណុំរឿងរួចនៅថ្ងៃនោះ អាជ្ញាធរស្រុកព្រៃកប្បាសបានបញ្ជូនសំណុំរឿងនេះ ទៅឲ្យខាងមន្រ្តីជលផលចាត់ការបន្ត ហើយលោក សៅ កុសល នាយខណ្ឌរដ្ឋបាលជលផលខេត្តតាកែវបានថ្លែងថា ជំនាញរបស់លោកបានទទួលកំណត់ហេតុ និងវត្ថុតាងពីអាជ្ញាធរស្រុករួចហើយដែរ។
តែរហូតមកទល់ពេលនេះ គេពុំឃើញមានការចាត់វិធានការច្បាប់អ្វីចំពោះក្រុមអ្នកអភិរក្សត្រី រួចចាប់ត្រីខ្លួនឯងទាំងនោះទេ៕
