(សៀមរាប) – ក្រុមកម្មករធ្វើផ្លូវប្រមាណ៧០នាក់ កាលពីរសៀលថ្ងៃទី១១ ខែមិថុនា ម្សិលមិញ បានលើកគ្នាមកធ្វើការតវ៉ានៅខាងមុខផ្ទះស្នាក់របស់អ្នកម៉ៅការម្នាក់ស្ថិតនៅភូមិគោកចក សង្កាត់គោកចក ក្រុងសៀមរាប ក្រោយអ្នកម៉ៅការរូបនោះពន្យារពេលបើកប្រាក់ខែពួកគេ។
ប៉ុន្តែក្នុងពេលផ្ទុះការតវ៉ាខ្លាំង សមត្ថកិច្ចក៏បាននាំអ្នកម៉ៅការផ្លូវនោះទៅកាន់សាលាសង្កាត់ដើម្បីបញ្ជៀសការផ្ទុះហឹង្សា។
ក្រុមកម្មករបានរៀបរាប់ថា ពួកគាត់ទាំងជាង៧០នាក់ជាកម្មករធ្វើផ្លូវបេតុង១ខ្សែក្នុងគំរោង(៣៨)ខ្សែក្នុងសង្កាត់គោកចក ឈ្មោះថាផ្លូវលេខ០៧ ដែលគេនិយមហៅថា ផ្លូវពេទ្យ (រ៉ាក់)។ ពួកគាត់អ្នកខ្លះអត់ទាន់បើកប្រាក់តាំងខែមីនាមក ឯខ្លះទៀតតាំងខែមេមក។ ហើយនៅរសៀលថ្ងៃទី១១ខែមថុនា អ្នកម៉ៅការសន្យាលើកចុងក្រោយថា បើកប្រាក់ខែឲ្យ ព្រោះធ្លាប់សន្យាច្រើនដងហើយ។ លុះពេលមកបើក បែរជាមេកានោះឆ្លើយថា អត់ទាន់មានលុយ ទើបពួកគាត់តវ៉ាបែបនេះ។
ក្រោយការសម្របសម្រួល លោក ទិត ឌីរ៉ា ចៅសង្កាត់គោកចក អ្នកម៉ៅការធ្វើផ្លូវបានដាក់កិច្ចសន្យាថា រសៀលថ្ងៃទី១២ ខែមិថុនា ខ្លួននឹងបើកប្រាក់ខែឲ្យកម្មករទាំងនោះ ហើយបើមិនបើកឲ្យទេ អាជ្ញាធរនឹងបន្តនិតិវិធទៅតាមទិដ្ឋភាពជាក់ស្តែង។
បើតាមការអះអាង អ្នកម៉ៅការនោះថា ខ្លួនមិនមានប្រាក់បើកឲ្យកម្មករ ព្រោះតែខ្លួនម៉ៅការខាត តែយ៉ាងណានោះ គេរង់ចាំមើលថា តើនៅរសៀលថ្ងៃទី១២ ខែមិថុនា នេះ លទ្ធផលទៅជាយ៉ាងណាបន្តទៀត៕
