អគ្គលេខាធិការ អ.ស.ប លោក អាន់តូ នីញ៉ូហ្គូថេរេស បានទទូចដល់យោធាមីយ៉ាន់ម៉ាឱ្យដោះលែងម្ចាស់ពានរង្វាន់ណូបែលសន្តិភាព គឺលោកស្រី អ៊ុង សានស៊ូជី និងលោកប្រធានាធិបតី Win Myint ក្រោយពីរដ្ឋាភិបាលយោធានេះ បានសម្រេចធ្វើការដោះលែងអ្នកជាប់ឃុំរាប់ពាន់នាក់ផ្សេងទៀត។
ក្រុមបាតុករមីយ៉ាន់ម៉ា ដើរតាមដងផ្លូវទាមទារឲ្យមានការដោះលែងលោកស្រី អ៊ុងសាន ស៊ូជី
ប្រព័ន្ធផ្សព្វផ្សាយក្នុងស្រុកបានរាយការណ៍ថា មីយ៉ាន់ម៉ាបានដោះលែងអ្នកជាប់ឃុំជាង ២.០០០ នាក់កាលពីថ្ងៃពុធ ក្នុងនោះមានអ្នកកាសែតនិងអ្នកផ្សេងទៀតដែលយោធានិយាយថា ត្រូវបានចោទប្រកាន់ពីបទញុះញង់ ឲ្យ ចូលរួមក្នុងការតវ៉ា។
ប្រទេសមីយ៉ាន់ម៉ាបានស្ថិតក្នុងភាពច្របូកច្របល់ចាប់តាំងពីកងទ័ពបានឡើងកាន់អំណាចនៅថ្ងៃទី ១ ខែកុម្ភៈនិងបានផ្តួលរំលំរដ្ឋាភិបាលរបស់លោកស្រី អ៊ុងសានស៊ូជី។
ចាប់តាំងពីពេលនោះមក ក្រុមអ្នកប្រឆាំងនឹងរបបយោធាជាច្រើនត្រូវបានគេឃុំឃាំង ហើយអ្នកខ្លះត្រូវបានផ្តន្ទាទោស ក្នុងនោះក៏លោកស្រី អ៊ុងសានស៊ូជី ផងដែរ ដោយចោទប្រកាន់ថា បានលួចបន្លំក្នុងការបោះឆ្នោតកាលពីខែវិច្ឆិកា៕
