តាកែវ — ករណីក្រុមគ្រឿងចក្រចាក់ដីលុបប្រឡាយរបស់រដ្ឋ នៅចំណុចទំនប់កៅសិប ស្ថិតក្នុងឃុំព្រៃផ្គាំ ស្រុកអង្គរបូរី កាលពីថ្ងៃម្សិលមិញនោះ ឥឡូវនេះ ក្រុមគ្រឿងចក្រនោះបានបង្ហើបឲ្យដឹងពីអ្នកបញ្ជាខ្លួនហើយ គឺជាមន្រ្តីគយម្នាក់។
ម្ចាស់គ្រឿងចក្រដែលបញ្ជាក់ថា ឈ្មោះ កុង ឈាវ បានថ្លែងថា លោកត្រូវបានមន្ត្រីគយម្នាក់ឈ្មោះ ថៃ បង្ខំឲ្យគាត់ដឹកដីចាក់លុបប្រឡាយរដ្ឋនោះដើម្បីសាងសង់ តែគាត់មិនដឹងថាគេសង់អីទេ។ លោក កុង ឈាវ បន្តថា បើគាត់មិនព្រមចាក់ដីតាមបញ្ជាគេទេ មន្រ្តីគយម្នាក់នោះនឹងចុះត្រួតពិនិត្យគូទឡានដឹកដីរបស់គាត់។
លោកថា ឡានបែនរបស់គាត់គាត់គ្មានស្លាកលេខទេ ដូច្នេះបើគយចុះពិនិត្យ គឺស្មើនឹងឡានគ្មានពន្ធ ហើយគេនឹងចាប់យកទៅទទេរៗជាមិនខាន។
ពាក់ពន្ធ័ករណីខាងលើនេះ យើងមិនអាចទាក់ទងមន្រ្តីគយ ដែលឈ្មោះថៃ នោះបានទេនៅថ្ងៃនេះ ដោយគ្មានលេខទូរស័ព្ទ។
បើតាមប្រជាពលរដ្ឋនិយាយថា ចំណុចប្រឡាយទឹកនោះ កន្លងមកមានប្រជាពលរដ្ឋក្រីក្របានមកសង់សំណង់ជាខ្ទម ជាតូបជាដើម ប៉ុន្តែក្រោយមក ក៏ត្រូវលោក រស់ រ័ត្ន អភិបាលរងស្រុកអង្គរបូរី ដឹកនាំកម្លាំងចុះទៅដេញ ដោយថា ទីនោះគឺជាដីសម្បត្តិរដ្ឋ។ លុះពេលឃើញក្រុមគ្រឿងចក្រដឹកដីមកចាក់លុបប្រឡាយបែបនេះ ធ្វើឲ្យពួកគាត់ភ្ញាក់ផ្អើលយ៉ាងខ្លាំង ព្រោះតែអាជ្ញាធរដេញប្រជាពលរដ្ឋក្រីក្រចេញ ហើយទុកឲ្យមានលុយចាក់ដីយកវិញម្តង។
តែយ៉ាងណា កាលពីថ្ងៃម្សិលមិញ ខណៈដែលក្រុមគ្រឿងចក្រកំពុងចាក់ដីលុបប្រឡាយ គេក៏ឃើញកម្លាំងដែលបញ្ជាផ្ទាល់ដោយលោក ឌឹម គឹមសាន្ត អភិបាលស្រុកអង្គរបូរី ចុះមកដេញគ្រឿងចក្រទាំងនោះ ធ្វើឲ្យពលរដ្ឋមានសង្ឃឹមឡើងវិញថា ទ្រព្យសម្បត្តិរដ្ឋអាចរក្សាបានវិញហើយ តែមិនដឹងថា ទៅថ្ងៃមុខទៀតយ៉ាងម៉េចទេ ព្រោះតាមដឹង មន្រ្តីគយនោះគេមានខ្នងបង្អែកគ្រាន់បើរដែរ។
យ៉ាងណាក៏ដោយ លោក ឌឹម គឹមសាន្ត អភិបាលស្រុកអង្គរបុរីបានថ្លែងថា លោកនឹងឲ្យកងវិស្វកម្មកាយដីនេះចេញវិញ ព្រមទាំងដាក់មន្រ្តីឲ្យឃ្លាំមើលមិនឲ្យមានការចាក់ដីលុបប្រឡាយនោះទៀតទេ។
បើយោងតាមមាត្រា២៥៩ច្បាប់ភូមិបាលបានចែងថា អ្នករំលោភយកដីសាធារណៈរបស់រដ្ឋ នឹងត្រូវពិន័យពី៥លាន ដល់៥០លៀន និងអាចជាប់ពន្ធនាគាពី១ឆ្នាំដល់៥ឆ្នាំ៕
