ប៉ុន្មានសប្តាហ៍ចុងក្រោយនេះ អ្នកធ្វើដំណើរតាមសាឡាងពីភ្នំពេញឆ្ពោះទៅត្រើយអរិយក្សត្រនៃភូមិសាស្ត្រស្រុកល្វាឯម ខេត្តកណ្តាល នឹងឃើញសកម្មភាពនៃការចាក់ថ្មចូលទៅក្នុងទន្លេ, ពួកគាត់បានសម្តែងការបារម្ភចំពោះការរួមតូចនៃទន្លេ។
យ៉ាងណាក៏ដោយ ករណីនេះ លោក គង់ សោភ័ណ្ឌ អភិបាលខេត្តកណ្តាលបានបកស្រាយហើយថា ការចាក់ថ្មចូលទឹកទន្លេក្នុងភូមិសាស្រ្តអរិយក្សត្រ ជាគម្រោងអភិវឌ្ឍន៍របស់ក្រុមហ៊ុន ឃុន សៀ (Khun Sea Development Group) ដែលបានជួលដីរដ្ឋចំនួន៧០ហិកតា ក្នុងការអភិវឌ្ឍតំបន់សេដ្ឋកិច្ចតាមដងទន្លេ។
ក្នុងកិច្ចសម្ភាសន៍ជាមួយសារព័ត៌មានក្នុងស្រុកកាលពីថ្ងៃពុធ តំណាងក្រុមហ៊ុនឃុនសៀ បានបញ្ជាក់ថា ក្រុមហ៊ុនបានជួលដីរដ្ឋចំនួន៧០ហិកតា រយៈពេល៥០ឆ្នាំ ហើយនឹងអភិវឌ្ឍតំបន់នោះឲ្យដូចជានៅទីក្រុងហុងកុង ដែលអាចមើលឃើញទឹកទន្លេនាពេលយប់។
សូមបញ្ជាក់ថា កាលពីខែឧសភា ឆ្នាំ២០២០ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានស្នើទៅគណៈអភិបាលគ្រប់រាជធានី-ខេត្តទាំងអស់ ត្រូវជួយទប់ស្កាត់ការរំលោភ ចាក់ដីលុបចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក និងបឹងបួដែលជាសម្បត្តិសាធារណៈ ព្រោះថា សកម្មភាពទាំងនេះ បង្កបញ្ហាដល់លទ្ធភាពនៃការរំដោះទឹក និងបង្កជាគ្រោះមហន្តរាយទឹកជំនន់ដោយសារ ច្រាំងទន្លេ ស្ទឹង ឬតំបន់ផ្ទៃរងទឹកភ្លៀងមួយចំនួនត្រូវបានរំលោភចាក់ដីលុប និងសាងសង់បិទផ្លូវទឹកនានា ដោយមិនស្របតាមលិខិតបទដ្ឋានគតិយុត្តជាធរមាន៕
