ភ្នំពេញ — ស្ថានទូតចិនប្រចាំកម្ពុជា កាលពីថ្ងៃទី២២ ខែកក្កដា បានសម្តែងការមិនពេញចិត្តចំពោះ ការផ្សព្វផ្សាយរបស់សារព័ត៌មាន Reuters ដោយបានដកស្រង់ការចោទប្រកាន់របស់ក្រសួងយុត្តិធម៌នៃសហរដ្ឋអាមេរិកថា “ក្រុម Hacker ចិនបានលួចទិន្នន័យទន្លេមេគង្គពីក្រសួងការបរទេសនិងសហប្រតិបត្តិការអន្តរជាតិកម្ពុជា”។
ទាក់ទិននឹងការលើកឡើងនេះ ស្ថានទូតចិនប្រចាំកម្ពុជា បានសម្តែងការព្រួយបារម្ភខ្លាំង និងប្រឆាំងជាដាច់ខាតចំពោះការលើកឡើងខាងលើនេះ។
ស្ថានទូតចិនបានគូសបញ្ជាក់ថា ភាគីចិនប្រឆាំងជាដាច់ខាត និងតែងបង្ក្រាបលើការវាយប្រហារតាមគ្រប់ទម្រង់នៅក្នុងប្រព័ន្ធអ៊ីនធើណេត កុំថាឡើយលើកទឹកចិត្ត គាំទ្រ ឬអនុគ្រោះចំពោះការវាយប្រហាររបស់ក្រុម Hacker។
ស្ថានទូតចិនបានលើកឡើងថា នៅលើពិភពលោកនេះ សហរដ្ឋអាមេរិក គឺជាប្រភពនៃការវាយប្រហារតាមប្រព័ន្ធអ៊ីនធើណេតដ៏ធំបំផុត ហើយទង្វើនៃការលួចតាមដានស្តាប់របស់ប្រទេសមួយនេះសូម្បីតែ“សម្ព័ន្ធមិត្ត”ក៏មិនលើកលែងដែរ។ រីឯចំពោះបញ្ហាសន្តិសុខអ៊ីនធើណេតវិញ ទំនុកចិត្តទៅលើសហរដ្ឋអាមេរិកត្រូវបានបាត់បង់យូរមកហើយ។
សូមបញ្ជាក់ថា កាលពីពេលថ្មីៗនេះ ក្រសួងយុត្តិធម៌អាមេរិក បានចោទប្រកាន់ជនជាតិចិនចំនួន៤នាក់ ទាក់ទងនឹងការលួចទិន្នន័យរស៊ើប និងសម្ងាត់ពីស្ថាប័នរដ្ឋនិងឯកជនក្នុងប្រទេសមួយចំនួន ក្នុងនោះក៏មានការលួចទិន្នន័យពីស្ថាប័នរដ្ឋក្នុងប្រទេសកម្ពុជាដែរ ពាក់ព័ន្ធនឹងការពិភាក្សាលើបញ្ហាទន្លេមេគង្គ។
_
ក្រសួងយុត្តិធម៌អាមេរិកបានឲ្យដឹងថា មុន ឬក្រោយខែមករា ឆ្នាំ២០១៨ សមាជិកនៃបណ្តាញលួចនោះ បានជ្រៀតចូលលួចក្នុងបណ្តាញរបស់ក្រសួងមួយនៅកម្ពុជា ដោយបានលួចយកទិន្នន័យទាក់ទងនឹងការពិភាក្សាគ្នារវាងរដ្ឋាភិបាលចិន និងកម្ពុជា លើការប្រើប្រាស់ទន្លេមេគង្គ ហើយក្រុមនោះ បានជួលអ្នកបកប្រែភាសាជនជាតិខ្មែរ ដើម្បីបកប្រែទិន្នន័យដែលលួចបាននោះ ដែលពួកគេ បានដាក់លេខសម្ងាត់ការពារថា «goodperson»៕
