មេដឹកនាំយោធាមីយ៉ាន់ម៉ា កាលពីថ្ងៃអាទិត្យ (១ សីហា) បានប្រកាសថា រដ្ឋាភិបាលសឹកត្រៀមសហការការងារជាមួយអន្តរការីពិសេសរបស់អាស៊ាន និងបានសន្យារៀបចំការបោះឆ្នោតពហុភាគីនៅពីរឆ្នាំខាងមុខ។
លោក មីន អ៊ុងឡាំង មេដឹកនាំរបបយោធាភូមា
នៅក្នុងសុន្ទរកថាតាមកញ្ចក់ទូរទស្សន៍ ឧត្តមសេនីយ៍ មីន អ៊ុងឡាំង បានចេញមុខមកធានាអះអាងប្រជាពលរដ្ឋភូមាថា រដ្ឋាភិបាលនឹងរៀបចំការបោះឆ្នោតសភាជាថ្មី នៅយ៉ាងយូរ ក្នុងខែសីហា ឆ្នាំ២០២៣ តាមបែបលទ្ធិប្រជាធិបតេយ្យ សេរីពហុបក្ស។
សេចក្តីប្រកាសនេះធ្វើឡើងតែមួយសប្តាហ៍ ក្រោយការប្រកាសលុបចោលលទ្ធផលបោះឆ្នោតសភាកាលពីខែវិច្ឆិកា២០២០ ដែលគណបក្សសម្ព័ន្ធជាតិប្រជាធិបតេយ្យ របស់លោកស្រីអ៊ុងសានស៊ូជីបានឈ្នះយ៉ាងត្រចះត្រចង់។ តែសម្រាប់លោក មីន អ៊ុងឡាំង លោកបានបញ្ជាក់ជាថ្មីទៀតថា នៅក្នុងការបោះឆ្នោតនោះមានការលួចបន្លំសន្លឹកឆ្នោតចំនួនជាង១១លានករណី៕
