ភ្នំពេញ — យោងតាមរបាយការណ៍សេដ្ឋកិច្ចពិសេស របស់ធនាគារអភិវឌ្ឍន៍អាស៊ី (ADB) ដែលចេញផ្សាយនៅថ្ងៃនេះ បានធ្វើការព្យាករណ៍ថា កំណើនសេដ្ឋកិច្ចរបស់ប្រទេសកម្ពុជា នឹងធ្លាក់ចុះគំហុកក្នុងឆ្នាំ២០២០ អាស្រ័យដោយកំណើននៃការនាំចេញមានការថយចុះ និងបរិយាកាសខាងក្រៅមានស្ថានភាពកាន់តែធ្ងន់ធ្ងរឡើងជាលំដាប់ ដោយសារ Covid-19។
តាមការព្យាករណ៍របស់ ADB នៅក្នុងឆ្នាំ២០២០ សេដ្ឋកិច្ចកម្ពុជាអាចនឹងធ្លាក់ចុះ ២,៣ភាគរយ មុនពេលហក់ឡើងមក ៥,៧ភាគរយ ក្នុងឆ្នាំ២០២១ ។
ការធ្លាក់ចុះដោយសារកូវីដ១៩ បង្កឲ្យប៉ះពាល់ធ្ងន់ធ្ងរចំពោះវិស័យសេវាកម្ម តាមរយៈការកាត់បន្ថយការមកដល់នៃអ្នកដំណើរបរទេស និងរំពឹងថា នឹងប៉ះពាល់ដល់វិស័យសំណង់ និងកម្មន្តសាល តាមរយៈការកាត់សង្វាក់ខ្សែសង្វាក់ផ្គត់ផ្គង់ និងការកាត់បន្ថយតម្រូវការ។
វិស័យសេវាកម្ម ត្រូវបានព្យាករណ៍ថា នឹងធ្លាក់ចុះ ១,៧ភាគរយ ក្នុងឆ្នាំ២០២០ អាស្រ័យដោយវិស័យទេសចរណ៍ធ្លាក់ចុះ និងកំណើនយឺតក្នុងវិស័យអចលនទ្រព្យ។
កំណើនឧស្សាហកម្ម ក៏ត្រូវបានព្យាករណ៍ថា នឹងថយចុះមក ៦,៥ភាគរយក្នុងឆ្នាំ២០២០ ជាមួយនឹងការថមថយកំណើន ក្នុងវិស័យផលិតកម្មកាត់ដេរសម្រាប់នាំចេញ និងវិស័យសំណង់ ស្របតាមកំណើនដែលជាប់គាំងនៅក្នុងសេដ្ឋកិច្ចប្រទេសឈានមុខចម្បងៗ និងការធ្លាក់ចុះគំហុក នៃកំណើនសេដ្ឋកិច្ចប្រទេសចិន ជាពិេសសជាមួយនឹងការរឹតបន្តឹង ចំពោះការអនុគ្រោះពាណិជ្ជកម្មដោយសហភាពអឺរ៉ុប ដែលនឹងចាប់ផ្តើមក្នុងខែសីហា ឆ្នាំ២០២០។
សម្រាប់កំណើននៅក្នុងវិស័យកសិកម្ម ត្រូវបានរំពឹងថា នឹងមានកម្រិតទាបត្រឹមប្រមាណ ០,៥ភាគរយ ក្នុងឆ្នាំ២០២០ ដែលជាការឆ្លុះបញ្ចាំងធៀបទៅនឹងការព្យាករណ៍ថា រដូវប្រាំង នឹងអូសបន្លាយក្នុងឆ្នាំនេះ និងការដែលអាជ្ញាធរបានផ្តល់សេចក្តីណែនាំឲ្យធ្វើស្រែប្រាំងតែមួយលើកប៉ុណ្ណោះ៕
